陳敏之生咗喇！2016年10位星爸星媽

2016年娛樂圈真係喜事連連，繼早兩日陳妍希生咗「小星星」，尋日陳敏之又宣布仔仔出世喇！一齊回顧下今年嘅星爸星媽啦！

陳敏之
「索腿天后」陳敏之尋日（21號）剖腹誕下重7磅11安士嘅仔仔，由於寶寶喺冬至出世，敏之講笑話可以叫佢做「雷冬至」或者「雷沙湯丸」，佢仲話生完即刻覺得好肚餓。
 
圖：陳敏之ig

陳妍希
「小龍女」陳妍希嘅仔仔「小星星」前日（20號）出世，B仔重7.7磅，身長50厘米，相當健康。老豆陳曉就希望仔仔生生性性，聽媽媽話。
 
圖：陳妍希微博

鍾嘉欣
「嘉欣BB」鍾嘉欣喺加拿大誕下囡囡Kelly，乳名「乖乖」嘅B女重7磅5安士。嘉欣之前怕寶寶冇奶食，返香港一陣又急住飛返加拿大，真係廿四孝媽咪。
 
圖：鍾嘉欣Facebook

陳茵媺
連生兩胎仔仔後，陳茵媺同陳豪終於追到個囡囡陳凱婷（Camilla），認真「三年抱三」。Camilla出世時重7.15磅，兩公婆都話好開心囡囡令佢哋有個圓滿家庭。
 
圖：陳茵媺微博

關心妍
關心妍囡囡楊榮心（Jovia）出世時雖然得6磅6安士，但佢就好好胃口，要每日食10至12次奶，阿Jade都好努力咁增加奶水，希望滿足到Jovia嘅需求。
 
圖：關心妍ig

李心潔
40歲嘅李心潔無懼風險，生下雙胞胎彭濟雲同彭子然。啱啱生嘅心潔完全唔捨得同寶寶分開，所以就算要飛去台灣出席金馬獎典禮都要帶埋BB去。
 
圖：李心潔Facebook

張嘉兒
前港姐張嘉兒以自然分娩誕下囡囡Leora，佢接受訪問時話，生B過程非常痛苦，佢痛足12個鐘先生得出，期間仲痛到嘔。所以話，媽媽真係好偉大。
 
圖：張嘉兒

胡諾言
「胡仔」胡諾言同陳琪終於追到個「真‧胡仔」胡澔錕（Jayden），BB重8磅1安士，相當足磅！胡仔不時喺ig度分享自己湊仔仔嘅片段，真係好溫馨。
 
圖：胡諾言ig

杜德偉
杜德偉同老婆李曉冰嘅仔仔Alex Junior (AJ) 出世時7磅重，Alex錫老婆同BB錫到燶，唔止幫手換片，仲特登請假陪老婆，佢最近仲寫咗首《抱緊處理》送俾小AJ。
 
圖：杜德偉ig

王力宏
Leehom老婆李靚蕾喺美國生咗細女王嘉娜（Jiana Wang）。囡囡出世後，Leehom即刻話對「前世情人」一見鍾情，而靚蕾就感謝Jiana令佢再次感受「生命的奇蹟」。
 
圖：王力宏Facebook