自煮大閘蟹。初禮驗

大閘蟹時節到喇，以往外出食或屋企煮都好少，又嫌貴又怕被人呃，見細佬同公主都買番屋企自己煮，老公又好似好想食咁，結果做左一大輪資料搜集，學左唔少野，買蟹開工～

原先見楊屋道街市有賣大閘蟹，一心打算在那兒買，但諗諗下第一次實比人呃，都係去大閘蟹專門店。

今次揀左發記清水大閘蟹專門店：資料按此

呢間近我公司荃灣沙咀道，原來元朗都有分店添。

九雌十雄，九月當造雌蟹，十月當造雄蟹，我這就是雄蟹。

雌蟹既蟹羔較硬，雄蟹既蟹羔較棉軟。

到十一月份，雄蟹開始起白油，原來係精子，蟹羔係白色透明狀，當年老爸都買過呢款雄蟹，以為比人呃左，點知原來都係蟹羔黎既。同事話呢Ｄ白色透明狀蟹羔先係極品添喎。

雌蟹肚圓；雄蟹肚呈三角形；當場店員都有示範我睇，我好似都唔係咁識分哈哈。

店員仲逐隻幫我撳開個三角形蟹奄，俾我睇下有無粉紅色，有的話就係有蟹膏，但多唔多就唔知喇。

網上資料指出，較正宗既蟹，蟹腳毛應該係金棕色，如果蟹腳毛呈灰灰黑黑的，可能係湖南等地的毛蟹，當然，要冒充起黎，染上啡色有幾難。

店員亦坦然，陽澄湖大閘蟹因產量較小，內地的達官貴人一早都包起哂，店內售賣的主要係太湖大閘蟹。

網上亦教路，嘔緊泡／眼仔碌碌既大閘蟹先係好野，代表生生猛猛，我呢隻都有嘔泡架哈哈。

一般大閘蟹專門店，都會跟埋呢Ｄ：
醋；赤沙糖（用黎調醋）；紫蘇葉；薑茶沖劑；買半籮以上才會跟剪刀

呢間既醋係自己調好左，唔洗加赤沙糖味道已經剛好，反而略嫌甜左Ｄ添。
薑茶沖劑我麻麻地，鍾意新鮮煲的，下面再講。

佢地整左說明書，可以跟番以上做法洗蟹同煮蟹。

我原先好想試下水煮，網上有師傅話水煮先正，但店員話最好蒸，唔會走味，我新手最後都係蒸。

洗刷蟹我用牙刷，較污漕既地方主要係蟹鉗果兩舊大毛。

真係要記得將蟹反轉蒸呀！

水滾落紫蘇葉入水中，放入蟹蒸15分鐘（我呢4隻係4.8襾）
紫蘇葉味道好香啊，在廳都聞到～

預備好一把尖利剪刀同筷子，又要再次褒揚一下我呢把杭州張小泉剪刀，太好用！

出爐喇～好緊張好緊張。。。

開蓋，蟹羔真係好似蛋黃油咁又滴又流來流去。

一口啜落去，啜啜啜，爽呀！

美中不足既係，蟹太細，蟹羔唔夠爆口，我係好想啜到成口都係蟹羔，多到漏多隻，所以再食我估我會買5襾以上的。

另外蟹肉無咩味，始終唔同三點蟹果Ｄ有鮮甜味，食大閘蟹，一心諗住啜蟹羔咁就岩喇。

大閘蟹寒涼，薑茶可驅寒和胃。

買左靚老薑，同埋原粒黑糖，煲個黑糖薑茶。

洗乾淨薑皮，用刷刷乾淨泥，連皮切片，呢度用左上面圖中的3分2。

中火煲薑20分鐘，焗一陣，再加入黑糖煲5分鐘，幾粒就夠，唔好太甜。

嘩，飲落去喉嚨辣辣的，好過癮！老公就耍手擰頭，逼極都係飲左幾啖=.='''

資料補充：
大閘蟹 (4.8襾) $65；5襾$75，買籮計為番每隻約$50，抵好多