【圖集】超得意！盤點2017年星BB
29.12.2017
話咁快，2017年嚟到尾聲喇，今年真係喜事連連，娛樂圈唔少人榮升星爸星媽，一齊睇下佢哋嘅星B有幾可愛啦！
張繼聰&謝安琪囡囡張靖（Karina、KaKaBall）
張繼聰同謝安琪一直好想幫仔仔張瞻添個伴，今年終於如願以償，喺3月23號誕下7磅半B女張靖。阿聰呢位模範老公當然超心痛老婆啦，仲話要等科技發達到男人都生到仔先會考慮再「造人」。
哥哥張瞻都好乖仔，成日都見到佢出盡渾身解數，只為博妹妹一笑。
黎諾懿&李潔瑩仔仔黎峰睿（Lugus、小春雞）
人見人愛嘅小春雞喺4月10號出世，重6磅6安士。雖然仔仔出世嘅時候神之馬壯忙住拍劇，但都堅持陪老婆生仔，同埋趕返屋企陪大小情人！
小春雞一出世就迷倒萬千女士，爹哋媽咪每次post相都有好多人like㗎！
胡杏兒仔仔Brendan
胡杏兒喺10月順產誕下「李寶寶」Brendan，最近杏兒趁住聖誕同大家分享全家福，雖然只係show到側面，但都見到佢白白胖胖好可愛呀！
杏兒同老公Philip都交遊廣闊，所以李寶寶一出世就好多契媽叔叔錫，好幸福呀！
車婉婉仔仔Justus Quinlan（BBQ）
車婉婉喺3月28號順產誕下B仔Justus，唔好睇婉婉咁纖瘦，BBQ出世嘅時候都有成9磅重㗎！
原來BBQ同蘇永康仔仔超friend，兩個BB成日一齊玩㗎！
蘇永康仔仔蘇展弘（Jazz、蘇爵士）
Jazz喺3月20號出世，一樣肥肥白白好cute！爹哋就話因為仔仔，IG多咗1萬粉絲。
爹哋媽咪多朋友，所以Jazz一出世就有好多契爺契媽關照，當中包括男神黃子華同歌神陳奕迅！
周汶錡仔仔Avner Lepeu
周汶錡喺3月20號開刀生產，細仔Avner重7.8磅，同哥哥Jacques一樣眼仔圓碌碌，見到都想錫多兩啖呀！
屋企多個男B，Jacques一啲都唔呷醋，仲成日同細佬講「I love you」，果然有大佬風範！
林盛斌仔仔林道申（Jaye、大兜仔）
Bob仔喺8月21號出世，同爹哋一樣人見人愛！三位姐姐都好錫小B，難怪阿Bob都話好欣慰。
就算忙住賺錢養家，阿Bob都好注重親子時間，盡量多啲陪家人同仔仔，係暖男一名！
張頴康&麥雅緻仔仔小花生
張頴康同麥雅緻嘅愛情結晶「小花生」喺10月21號出世喇！B仔重7磅幾，身為模範老公嘅阿康當然全程陪住老婆啦，見到新生命來臨，兩公婆都感動到喊喊豬添！
張達倫仔仔張凱碩（Zachery、勁秋雞）
Zachery喺10月12號出世，重7磅幾，Max呢排都係忙住拍劇，但幾忙都好，一定會留返時間畀太太同寶寶。
當初宣布太太有孕嘅時候，Max就話勁秋雞要同小春雞較勁搶徐榮囡囡包包，到底最後包落誰家呢？
孫慧雪仔仔Riley
孫慧雪喺7月28號開刀誕下B仔Riley，寶寶營養充足，一出世已經8磅10，個樣同媽咪一樣又清秀又cute。
Riley好識畀反應，仲識得扮打嗝避開掃風，好鬼馬呀下！
楊洛婷&黃天翱囡囡Tanya Faith
Rabeea喺9月14日順產誕下6磅半B女Tanya Faith，頭髮多多，皮膚白雪雪，繼承到爸爸媽媽嘅美貌。
Rabeea同Tim係出名嘅恩愛夫妻，佢哋話「Tanya」係合埋兩個人嘅名而嚟嘅，名副其實係佢哋嘅愛情結晶！
圖：眾星爸媽 IG
43060 次觀看
