學習時間表唔奏效？4招提升做功課、溫習效率！

各位家長有無遇過以下嘅情況：明明已經制定咗學習時間表，偏偏仔女就係無辦法跟時間表做好功課、溫好書？仔女跟唔足時間表，唔一定係因為曳或者懶，會唔會係當中忽略咗對佢哋嘅特質嘅考慮呢？不如睇睇以下4招可唔可以幫到你。

1. 揀「最佳時間」嚟做功課
仔女明知夠鐘做功課，點解仲喺度拖拖拉拉呢？實情每個小朋友做功課嘅「最佳時間」都唔一樣，有啲小朋友放學返到屋企就會馬上做功課，有啲就要玩一陣、睇吓電視充充電先開始。家長能夠按仔女情況適當調節做功課嘅「最佳時間」，效率自然提升。

2. 番茄工作法
假如仔女係容易分心型，為佢哋制訂時間表時，不妨試試將「番茄工作法」融入其中。「番茄工作法」原理係將時間好似廚房用果啲番茄型計時器咁分割，以三十分鐘做單位，頭廿五分鐘小朋友要好專心咁做功課或溫習，最後五分鐘就可以休息。依個方法可以幫容易分心嘅小朋友專注起嚟，而且仲可以將自己嘅努力具體化，增添學習動力。

3. 交替溫習
小朋友總有一兩個學科係特別有興趣，家長可以梅花間竹方式安排溫習時間，先俾佢哋溫習有興趣嘅學科，之後到唔鍾意嘅學科，如此類推。咁樣可以幫助佢哋降低對溫習嘅厭倦感，又唔會令佢哋只係溫習自己有興趣嘅學科，唔溫唔鍾意嘅學科。

4. 子女有Say
講到尾，小朋友先係時間表嘅用家，盲目將人哋嘅成功方法硬套到自己仔女身上，未必同樣會得到成功。多聆聽仔女嘅想法，設計出佢哋感興趣嘅時間表，先可以吸引到佢哋跟從㗎。
 
感謝Learnlex 授權轉載內容