學識6招 夫妻嗌交不傷感情

所謂「相見好，同住難」，兩公婆日對夜對，難免有拗撬。不過，嗌交唔等於要反面，記住以下幾個招式，以後夫妻嗌交就唔再傷感情，關係仲可能更上一層樓添！

​Text/Rachel

第1式：對事唔對人
夫妻嗌交大多因為睇唔過眼對方嘅處事方法，但好多人喺表達不滿嘅時候，都錯將焦點放喺另一半身上，甚至作出人身攻擊。
學下對事唔對人，直接指出對方不足，唔會傷害愛侶感受之餘，同時鞭策佢作出改善啦！

第2式：切忌翻舊帳
「你上次點點點……」呢句說話極危險！將過去唔開心嘅事搬返出嚟講，唔單止挖返傷你哋嘅舊瘡疤，仲會俾對方知道你仲嬲緊咸豐年代嘅事，覺得你小器。
其實，過咗去嘅事就let it go，就算想討論都擇日再講啦！嗌交仲翻舊帳，只會火上加油。
 
圖片來源：互聯網

第3式：俾機會對方表達意見
好多時所謂嘅嗌交，都係由一個人鬧鬧鬧，直至對方頂唔順開口反駁開始嘅，最後一發不可收拾。
就算有咩唔開心，都要俾個位人哋思考同解釋下。連珠炮發只會令對方感到煩厭，冇辦法冷靜咁同你討論，令本來可以簡單處理嘅小事演變成夫妻間嘅戰爭。
 
圖片來源：互聯網

第4式：小心用詞
有啲說話講咗出口就收唔返㗎喇，你一時嘅口舌之快，可能已經喺對方心裡面投下咗原子彈，留下一世陰影！
就算鬧到面紅耳赤，都要注意用詞，唔好侮辱對方，唔好捏造指控，更加唔好口快快講「我要同你離婚！」記住你只係想表達心中不滿，唔係撩交嗌。

第5式：君子動口不動手
無論幾嬲都好，都唔可以亂咁掟嘢，甚至郁手郁腳。拳腳冇眼，因為一時火遮眼傷害到愛你嘅另一半好唔值得！
真係嬲到不能自已的話，就去個廁所，離開一下現場，雖然未必幫到你哋解決紛爭，至少避免咗造成更大傷害。

第6式：適時跪低
嗌到面紅耳赤，但雙方依然各執己見，甚至越演越烈，就要有人考慮下跪低。
「跪低」唔係指完全放棄自己意見，聽曬另一方話，而係等對方知道自己嘅重要性，話俾佢知你唔想因為爭吵而傷害咁重要嘅人，等大家冷靜落嚟之後，再互訴心聲，一齊檢討，一齊思考改善方法。

贏咗場交，輸咗頭家，抵咩？
嗌交，往往由一方表達不滿開始，慢慢雙方腦海中只淨低「我要贏呢場交」嘅念頭，最終演變成維護面子嘅戰爭。
要記住，表達不滿嘅原意係為咗改善關係，而唔係令關係更惡劣，所以就算嬲到噴火，都要保持克制！