新生嬰兒黃疸(二)病理性黃疸

好多時媽媽聽到BB要抽血驗膽紅素都好驚,甚至有媽媽聽到BB太黃要送去兒科照燈冇得出院,直頭攬住個BB大喊叫執媽走開,話要同BB一齊返屋企,唔肯畀BB我。

通常我都會安慰佢地話:「帶咗BB返屋企,你對住個黃甘甘、掛住瞓、唔肯食奶嘅BB會更驚,知你唔捨得,但我地都係想畀最好嘅治療BB,放心交畀我哋啦!」再配合誠懇眼光,媽媽們多數都會冷靜落嚟。

的確,早啲發現BB黃,早啲幫佢照燈,早啲幫佢overcome到身體轉變係好事嚟嘅,不過就唔係個個BB都咁好彩,發生病理性黃疸,就會嚴重好多了!

病理性黃疸成因:
1)呀媽同呀B唔同血型(即係Rh+/-)-型血嘅呀媽陀住+型血嘅呀B,兩者血液一接觸,媽咪身體嘅抗體就有機會攻擊呀B (複雜嘢,真係想知可以再問執媽)
2)新生嬰兒感染引致溶血,例如肝炎、腦炎、肺炎、尿道炎、宮內感染等等
3)突然大量膽紅素產生,包括生產過程導致頭部產生大量瘀血、紅血球過多、蠶豆症等等

由於嚴重病理性黃疸係可以影響腦部造成腦損傷的,️所以如果發現BB厭食、嗜睡、哭聲尖銳、無力、嘔吐、不安、甚而痙攣、肺出血等就唔好諗立即去急症室喇!好嚴重好嚴重有可能要幫BB換血添㗎!

媽媽同屋企人千祈唔好畀保嬰丹、珍珠末嗰啲嘢BB食呀,隔籬屋三姑六婆個仔頂得順唔代表你個B頂得順㗎!
世衛建議,初生BB除咗母乳之外唔食任何其他嘢㗎!水、葡萄糖水都唔可以㗎!

你哋BB有冇試過黃到檸檬咁呀?分享下你哋嘅抗黃疸之路呀!
 
閱讀更多
解構B型鏈球菌
蠶豆症(一)
蠶豆症(二)
蠶豆症(三)

感謝港式執媽授權分享內容。
更多產科知識,即上「港式執媽」專頁:https://www.facebook.com/pg/hkmidwife
 

9348 views

inter scroller
#1801