日日無間做 四招keep住夫妻甜甜蜜蜜

無間做不是傳說！瑞銀上週公布《價格與收入》報告，香港每週平均工時超過50小時，冠絕全球。許多夫妻都是打工仔，兩公婆日忙夜忙，為的只是建立個安穩的家，卻犧牲了寶貴的相處時間。唔想為咗賺錢，輸咗頭家？學識以下四招，保證夫妻keep住甜甜蜜蜜。

Text_Rachel

1. 每日15分鐘盡訴心中情

時間同擳牙膏一樣，只要肯用力擳，總會找到時間。無論幾忙都好，每日嘗試騰出至少15分鐘的時間，夫妻分享一天的經歷，或者傾訴煩惱，避免「太多嘢積埋積埋都無謂再講」的情況發生，同時有助紓壓，一舉兩得！

2. 認真看待每次約會

以為結婚之後就可以隨隨便便，不用講浪漫？大錯特錯！定期約會是維持夫妻情趣的不二法門。輪流細心規劃行程，出門前留意打扮，愛侶自然感受到自己對夫妻關係的重視，令感情一直升溫。

3. 約定「冷靜期」

時間有限，浪費在吵架上實在無謂。所謂床頭打交床尾和，交談到面紅耳赤時，夫妻可約定先補眠，大被冚過頭，新的一天又有新希望。情緒太激動的話，可以選擇做運動發洩情緒，待雙方冷靜後再作討論，避免因一時意氣說出傷害愛侶的話。

4. 肉麻說話不怕多講

千萬別以為「凡事心照啦」。人人都渴望愛侶欣賞同關心自己，避開講肉麻說話，分分鐘令對方誤會此情不再。不如放開胸懷表達愛意，在忙到甩轆時傳個噓寒問暖的訊息，就算無間做，都做得開心少少。