今次嘅個案有少少特別，唔只係肯唔肯埋身食或者夠唔夠奶嘅問題，而係BB先天舌繫帶過緊。
呢個係一個先天性情況，其實唔嚴重的，畀在喺古代，喺屋企幫你接生嗰個三姑六婆直頭會用指甲幫BB「咪」斷嗰條脷根，之後就可以食奶㗎喇！
短脷根會影響食奶，因爲食人奶時，BB脷仔要伸長去掃媽媽嘅乳暈位置加埋啜力，將奶掃向自己個口，而短脷根令BB只接觸到少部份乳暈。
同埋條脷根會拉住棚下牙肉，令到佢反射性成日咬媽媽嘅乳頭。而今次呢個BB就冇力啜奶奶，令到媽媽嘅乳房清空得唔足夠，從而上奶上得唔夠快，加上佢嘅奶泵size唔適合，令到媽媽奶產量唔足夠，成日俾家人質疑唔夠奶畀BB飲。
講者無心，但畀個咁努力去追奶嘅媽媽聽到其實好傷心㗎！我第一次檢查乳房已經覺得好多奶塞咗喺入面，透過按摩加埋教導正確手揸奶方法，當晚媽媽產量已經多咗1安，之後靠佢嘅努力，每次泵奶都過百以上。
對好多富媽黎講可能係易事，但對於靠自己努力揸揸泵泵先得到呢個珍貴數字，媽媽真係出咗萬二分努力，為咗唔好令BB出現乳頭混淆，爸爸媽媽仲一直每日每餐用杯仔嚟餵，係幾咁費時費心力嘅一件事，所以我真係好欣賞佢哋！
BB已經做好手術幾日，而家好努力學習緊正確嘅食奶方法，媽媽亦都好努力繼續去keep住奶量，希望情況繼續好轉，BB可以繼續食到珍貴嘅人奶！
感謝港式執媽授權分享內容。
更多產科知識，即上「港式執媽」專頁：https://www.facebook.com/pg/hkmidwife
