對好多港媽嚟講，老公可以陪產幾乎成為入產房生仔最重要嘅事！而呢條題目都係本執媽考讀助產士入學試嘅題目。
好多研究都講過，丈夫陪產為孕婦提供大量嘅心理支援、令到孕婦覺得待產時間較易過、增進夫妻感情、讓爸爸體會妻子生產所承受嘅痛苦、令爸爸更能感受角色轉變等等。
事情有咁理想就好了，有老公陪產的確係好，但老公入去陪產之前都要自己做好心理準備，評估下自己嘅能力。點解咁講呢？生產嘅環境好多時係遠超乎爸爸想像㗎！
首先，你會有機會見到一個唔知係唔係你老婆嘅老婆！明明平時個老婆係乖乖女、斯斯文文聽聽話話；又或者係一個女強人、天不怕地不怕；但眼前嗰位一肚痛就尖叫、捵床捵蓆、叫到好似驅魔人嘅女人係邊個黎㗎呢？有機會老婆仲聞笑氣聞到瘟瘟沌沌，好似飲醉酒咁！
爸爸呢個時候就成為一個好重要嘅角色喇！提供心靈支持、幫手抹汗、不斷讚老婆好勇敢好叻等等，就一定唔少得喇！好多時如果好怕痛嘅媽媽，見到老公都立即會嗲下，嗲完就會有力量繼續面對肚痛㗎喇。當然唔係個個媽媽都一秒變驅魔人嘅，好多都可以控制自己嘅。
其次，就係爸爸有機會見到血腥場面！生仔正常都會出血，唔好彩嘅子宮收縮唔好、胎盤滯留等等仲有機會大出血！加上如果有機會剪會陰傷口，嗰種血肉模糊，加埋胎水氣味嘅場面，唔係每個爸爸都頂得順的！唔係血腥味咁簡單！所以爸爸喺入產房前可以上網睇定生仔短片、個腦入面想像定會預見嘅畫面！如果怕血可以淨係望住老婆個樣！唔好望下面發生緊咩事了！如果你聞到陣味想暈想嘔的話！慢慢坐返落去陪產嗰張櫈到！
千！萬！唔！好！死！頂！
千萬唔好突然間啪一聲跌落地，姑娘都唔知救媽媽先、定BB先定係爸爸先好喇！好忙呀！聽同事講，試過有個爸爸，想搵佢剪臍帶嗰刻唔見咗佢，原來佢喺張櫈到暈咗，塊面青晒！（待續）
感謝港式執媽授權分享內容。
更多產科知識，即上「港式執媽」專頁：https://www.facebook.com/pg/hkmidwife
更多精彩內容：【特集】生B懶人包
