香港政府而家賦予媽媽十個星期產假嘅權利，每間公司都應該遵守。
而懷孕期間如果媽媽不適，係可以向公司拎病假㗎！上至早產、產前出血要住院、胎盤低要留院觀察，下至些微狀況例如腳腫、腰酸背痛都需要休息！
只要你覺得身體唔適宜返工，都唔好勉強自己。講真，一世人會生幾多個BB？多數一個起兩個止，多極四個喇好未？
有幾可香港女人可以有放低女強人嘅身份？接受到身邊老公、四大長老、身邊所有人凡事遷就？身為媽媽，一定係BB最重要㗎喇！
不過要sick leave記住去街唔好放fb/ig，實在太多sick leave 之後去玩被同事講，為免大家唔happy，sick leave期間都係盡量低調好。
另外，如果真係不幸早產，喺產假開始前已經入咗院，記住由入院嗰日計，至BB出世嗰日都係計sick leave，產假係由出世嗰日先開始計㗎！
記得要喺出院前同姑娘講聲要拎sick leave同產假證明！
點解我咁講呢？話說有日有位早產媽媽，住咗兩日院後，BB第三日就出咗世，理應出世前嘅兩日係病假嚟嘅，但佢出院時冇要求病假紙，醫生冇特別準備到畀佢，媽媽出咗院事後先打返嚟醫院講想補發病假紙，有位同事唔想煩，想叫佢用產假cover嗰兩日病假，好彩最後呢位媽媽堅持，佢先拎得返病假紙。
我望住呢件事發生，都忍唔住講咗句：「俾在係你生BB早產咗，都唔會想用產假cover病假啦！」
唉，只可以話唔係個個女人都會體諒女人，即使佢都生過仔都係咁話！生完BB要返工已經好唔捨得個仔，陪到多一日就一日，點解個媽媽只係維護緊自己應得嘅權利，都俾人嫌麻煩，仲要俾啲 mean mean 醫護阻撓？
有冇媽媽係懷孕期間遇到不公平事呀？同執媽分享下！
好期待嚟緊14星期產假呀！到底幾時先至有？
呀！另外成日都想提啲爸爸，香港男士有三日侍產假，理應係可以隨時拎，因為預唔到老婆幾時生㗎嘛，但如果真係想善用呢三日侍產假，記得唔好喺老婆仲住緊醫院嘅時候拎！公立醫院一日得兩節探病時間㗎咋，你拎咗假都冇特權全日留喺醫院陪老婆㗎，佢出院返屋企之後先需要你㗎！
實在聽到太多媽媽話俾我知太後悔冇提老公，叫佢哋唔好一聽到BB出世就立即拎晒三日假！極浪費呀！
＊以上只適用於公立醫院
感謝港式執媽授權分享內容。
更多產科知識，即上「港式執媽」專頁：https://www.facebook.com/pg/hkmidwife
