黃疸實在係太常太常太常見，普遍到差唔多個個初生BB都經歷過。但係媽媽十月懷胎，出盡九牛二虎之力先生得出，當然唔想BB受苦啦！每次見到BB要抽血，無盡嘅等待又擔心真係好慘，又怕冇得同BB一齊返屋企。
首先要知道，新生嬰兒黃疸分病理性同生理性，病理性下篇再解釋，今次講生理性先。
生理性黃疸成因
- BB肝臟未發育完成，一時之間處理唔到突如期來嘅紅血球老舊廢物，因為喺媽媽肚入面一直都係呀媽搞掂，而家突然要自己轉化紅血球有困難；
- 腸臟蠕動得慢，正常菌落又唔足夠，令到膽紅素排泄唔切。
生理性黃疸高峰期係出世後4至7日，所以我成日同媽媽講，過到呢個星期就過關㗎喇，因為出咗院之後BB情況就由母嬰健康院跟進，健康院姑娘會評估BB體重同黃疸情況，是但一樣超標就要拜拜入院㗎喇！
造成母嬰分離真係冇陰功，但好可惜頭一個星期媽媽奶就特別少，加上餵奶姿勢如果唔正確就會啜損乳頭，損咗就更難餵奶，難餵奶就更上唔到奶，BB唔夠奶飲就更黃，好多媽媽就係呢個惡性循環到放棄餵人奶喇！
但其實可以用超勤力方法嚟上奶㗎，只要夠奶，黃疸機會就大大下降，因為膽紅素可以經屎屎排出嚟，如果唔夠奶嘅媽媽可以跟呢個「地獄輪迴餵奶表」嚟餵奶：
手搾奶可以轉成泵奶，加上大量飲水份（每日3L以上），可以係炒米茶或者上奶湯，另加BB隨時想食就畀佢無限量暢飲，人奶應該feed on demands 的。
其實我只係想表達要定時手搾埋剩低嘅奶，「愈清得多愈上得快」就係人奶定律，當然時間可以有走盞喇，同埋只需要凌晨咁做，因為半夜催乳激素分泌最多，追奶最有效，當然你覺得人奶真係嚴重不足，日頭都可以咁做喇！但要注意休息，太勞累都上唔到奶㗎！
直到母嬰健康院姑娘話BB體重同黃都正常，就可以根據當時你想唔想儲後備奶，定係想餐餐清，嚟決定泵唔泵咁多次奶喇！但開頭嗰個星期努力追奶係值得嘅！
- 首要條件：食奶姿勢正確
- 次要條件：BB配合
- 再加埋：手渣奶/泵奶姿勢正確
最近有個好勤力嘅媽媽朋友，keep住差唔多成個星期都盡量幾個鐘就埋身再泵奶，每一日都聽到佢人奶不斷升，BB都好成功地唔需要入院照燈。
有冇邊位媽媽想分享下BB黃膽嘅慘痛經歷？你哋BB最高紀錄俾人抽咗幾多次血呀？關於地獄輪迴餵奶詳細使用方法可以再問我。
仲有好多嘢想講，等下一篇啦！
感謝港式執媽授權分享內容。
更多產科知識，即上「港式執媽」專頁：https://www.facebook.com/pg/hkmidwife
