錫住初生BB，探訪注意呢啲！
08.01.2019
最近好多朋友生BB呀，嚟緊會更加多，將會出現一輪探B潮喇！作為執媽，有啲重點要提下大家嘅。
其實媽媽，尤其係新手嗰啲，本身對於湊BB都有啲揦手唔成勢，又餵奶又換片，轉頭又無限大輪迴，仲要抽時間瞓覺、食坐月餐，所以坐月其間，媽媽唔夠瞓，個樣有啲頹頹地係好正常㗎！
如果你本身唔係上門幫手湊B煮飯教餵奶嘅話，可以等媽媽坐完月先上去探佢嘅。
咁探B有咩注意事項呢？等執媽話你知！
1）洗手洗到上手臂
其實係我要求高啫。本身執媽有啲潔癖，不過相信十個護士九個都有。我覺得只要行過出街，個人就已經係污糟咗，而且你抱BB時會用手臂抱佢㗎嘛，你掂過乜嘢，BB就間接掂嗰樣嘢㗎喇！
想像下你行出街，手臂會揩到欄杆、公開交通工具嘅門、甚至係坐你隔籬滿身大汗嘅臭男人，試問又點可以畀一個免疫力咁低嘅BB，間接掂果個滿身大汗嘅臭男人呢？
2）入門口前除鞋
唔駛解釋喇，平時返屋企都需要做喇，我教我兩歲幾既姨甥仔：「平時曱甴行過條街，你又行，再著埋對鞋返屋企，咪好似畀隻曱甴行入屋企咁囉！」
兩歲幾都識，你都要識做喇！
3）衣物要乾淨
唔使要著新衫咁誇張，但唔好噚日著完今日再著去探B囉！都係嗰句，對我嚟講出過街就污糟㗎喇！我有個護士朋友仲誇張，話想探B嘅人都著醫院防疫保護衣，當然係講笑啦，但聽完佢咁講我即刻覺得自己潔癖都唔算嚴重。
同時，如果有養貓狗嘅話，要留意身上有冇黐咗動物毛髮呀，如果係有養開寵物嘅媽媽應該唔會介意，但冇養開嘅話都可能會介意㗎！
4）避免「太刺激」
生完BB同朋友都有雞啄唔斷嘅話題，生仔有幾痛、會陰有幾唔舒服、點收身等等等，但最好都要控制音量，唔好嚇到BB，你知一班女人嘅聲浪可以幾大㗎啦！
仲有抱住BB海量selfie 都要留意，唔好開閃光燈閃親佢對眼。
另外有好多人都食煙的，記住，二手煙會增加新生嬰兒猝死風險！探B前千祈千祈千祈唔好食煙！家人亦都應該戒煙。
其他要留意嘅係新手媽媽真係好忙好累㗎，探訪一陣就好㗎喇，唔好阻住媽媽休息同餵奶。
5）唔好錫BB
唔好錫BB唔好錫BB唔好錫BB！實在太重要所以要講三次！
大人有嘅細菌／病毒實在太太太多，一個新出世既BB實在對付唔到㗎。成日都有新聞見到BB俾人錫完一啖命都冇埋！
有時病毒潛伏期係冇乜徵狀㗎，但仍然有傳染性。有做兒科病房嘅朋友話我知，收過唔少BB，擺完滿月酒之後病毒感染，搞到要入深切治療部！到底大人有幾毒？
雖然BB係好可愛，大人見到會好肉緊好想攬住嚟狂錫，但你叫人地呀媽情何以堪？又多謝你嚟探佢哋，但又唔好意思出聲話你，所以各位要緊記以上嘅探B禮儀喇！
66128 次觀看
