【助產士話你知】冇得揀開唔開刀!嚴重妊娠毒血症

喺醫院,好多媽媽會忍受唔到痛楚,想要求醫生幫佢開刀,咁當然好多時候都唔會你要求就有得開啦!
 
但係原來有啲情況係你冇得揀,即使你想順產,我哋都等唔切要即刻推你去剖腹㗎!睇完你就明白,原來可以順產到係代表你一切normal,係應該感恩一切順利。所以唔好再話我哋衰點解唔肯幫你/你老婆開刀生個BB出嚟喇!痛唔係一個開刀原因嚟㗎!
 
生產從來都好似踏一隻腳入鬼門關,因為你永遠唔知下一秒發生咩事,有樣產科急症叫做妊娠毒血症,係可以無聲無色出現得好快!嚴重起嚟可以攞你命,因為呢種病可以同時影響你心、肝、肺、腎、腦,而且可以喺一個產前完全正常、good past health 嘅媽媽身上發生。
 
而真正嘅成因係不明㗎,淨係知道胎盤有啲物質令到媽媽受刺激,全身嘅血管都有可能收縮,身體都會出現嚴重水腫。除嚴重水腫外,媽媽血壓會上升(>140/90mmHg)、出現蛋白尿,其他病徵包括:

  • 嚴重頭痛
  • 視力模糊、出現閃光
  • 上腹疼痛、嘔吐等

 
媽媽如果出現以上症狀,必須立即立即、馬上馬上去醫院,因為妊娠毒血症係可以引發抽筋(痙攣)、導致肝、腎、肺衰竭、凝血問題等等,媽媽同BB嘅生命都會有危險的。
 
唔係一出現妊娠毒血症狀都一定要開刀的,但當你血壓唔受控,子宮頸等極唔開等唔受控嘅情況之下先需要開刀。所以,如果醫生同你講過你有呢個病,為咗你自己同BB,一定要按時食藥、按時覆診!
 
暫時醫學上可以做到嘅嘢就係觀察,如果係high risk 嘅就食定亞士匹靈預防,有唔受控嘅情況一定要住院監察,唔好扭計要出院喇!

感謝港式執媽授權分享內容。
更多產科知識,即上「港式執媽」專頁:https://www.facebook.com/pg/hkmidwife

14778 views