【助產士話你知】B型鏈球菌係咩?

有時聽啲媽媽講起,佢哋中咗B鏈,令到佢哋好擔心,到底B鏈係咩嚟㗎呢?

其實B型鏈球菌喺媽咪身體上係正常嘅細菌,容易喺會陰同肛門部位搵到,對媽咪係唔會有影響嘅,最多只係多少少分泌物同埋懷孕時有尿道炎,但係好衰唔衰,呢隻菌係會喺穿水之後攻擊BB㗎,有機會(1-2%)引發早產、肺炎、細菌入血等等,再嚴重啲會導致腦炎。

眼見B鏈可以產生咁強嘅併發症,香港已經落實咗全民普查喇!所有媽媽喺35至37週期間要喺陰道同埋肛門拎啲分泌物去驗。

如果真係中咗其實都唔使驚嘅,只要喺待產期間,即係開始進入產程或者穿水之後每幾個鐘打抗生素就可以保護BB㗎喇!

如果呢類嘅BB出世冇發燒、喊得好,其實可以跟住媽咪一齊去產後房嘅,但係如果一出世嗰下已經發燒、抖氣抖得差、媽咪生得太快打唔夠針等等,就有機會要去兒科觀察㗎喇!而好多媽咪都因為要短暫同BB分開而好肉痛。

另外,如果你一早選擇開刀,因為預計係唔使穿水好耐同BB唔會經過產道,理論上係唔使做呢個普查嘅,但世事嘅嘢話唔埋㗎,你點會估到幾時突然間穿水呢?

同埋如果你懷孕期間尿道炎驗到有呢隻菌,或者上胎BB試過嚴重感染,你都可以唔使做普查而直接當你中咗㗎喇!

試過有個可憐嘅BB,媽咪35週驗B鏈係唔中㗎,最後佢40週出世,喺醫院期間一切正常,但返咗屋企兩日之後發燒抽筋,入院抽脊髓液發現呢隻病毒呀陰公!估計媽咪喺35週之後先中咗呢隻菌,真係陰公豬呀!

感謝港式執媽授權分享內容。
更多產科知識,即上「港式執媽」專頁:https://www.facebook.com/pg/hkmidwife

50210 views