想知BB有無唐氏綜合症，其實有好幾個方法，就等我哋由淺入深去了解下佢哋嘅利弊。
媽媽可能以為，選擇產前檢查最大原則可能係準確或者價錢平，其實安全最重要，以對媽媽同BB影響最細為先。例如懷孕期間所有有幅射造影都係可免則免。所以，非入侵性的產前檢查為首選。
咁非入侵性的產前檢查係點？一如字面解釋，檢查並唔會有儀器放入去母體 (抽血陰道檢查唔計㗎)，以避免因檢查而有小產風險。
先講較常見的非入侵性檢查，全港八間公立醫院都會提供唐氏綜合症篩查 (Down's syndrome screening )，喺懷孕11週到18週6日都可以做到。遲過18週6咁點好？準確度會大幅下降，所以大家記得早啲預約產前檢查！
講呢個篩查前，有一件事要大家清楚先，呢個篩查並唔係百分之百準確，換言之，無法確診唐氏綜合症。佢只可以利用各個指數去計岀BB有唐氏綜合症的風險指數，而要診斷唐氏綜合症係需要用到入侵性檢查，之後我會再講入侵性㗎喇。
而呢個唐氏綜合症篩查都分為兩期：
第一期
於11週到13週6日進行，準確度有成八至九成㗎！如無意外，例如作過小產或者無喺私家照過超聲波，呢次就係你第一次喺公立醫院照超聲波，因為第一期唐氏篩查需要利用超聲波度頸皮和鼻骨。
點解係頸皮？其實係研究顯示有唐氏綜合症BB嘅頸皮比較厚和無鼻骨！頸皮超過3mm以上可疑程度就高咗。但頸皮厚都唔一定係唐氏，所以會配合埋抽媽媽血入面的hCG & PAPPA 兩款荷爾蒙，再綜合媽媽年紀 (年紀越大，風險越大)，和有無試過有唐氏綜合症BB歷史，去計一個風險指數。
第二期
如果錯過左第一期，就只可以做到準確度較低的第二期唐氏綜合症檢查，第二期媽媽無需要度頸皮，只需要抽血檢驗hCG 同AFP，再綜合媽媽年紀和有無試過有唐氏綜合症BB歷史，但準確度得番六至七成，所以記得要係13週6之前做到呀！
呢次超聲波仲會照埋BB長度CRL (crown root length)，睇下週數啱唔啱同子宮有無肌瘤等等。
公立醫院嘅做法係，如果發現唐氏風險高過1in 250，即係你嘅BB有250份之1機會係唐氏BB，就會再提供準確度更高的檢查。
係咩檢查？之後話你知！有無人就嚟要做唐氏檢查喇？準備好見BB未呀？
感謝關你Nurse事授權分享內容。
更多懷孕、分娩資訊，即上「Nurse事」專頁：https://www.facebook.com/urnursecare/
更多精彩內容：【特集】生B懶人包
