小心踩地雷 6句說話激死老婆

開講有話,嘢可以亂食,說話唔可以亂講,以下六句說話,唔單止會令老婆嬲嬲豬,仲會搞到日日家嘈屋閉。
 
 
1. 「知道喇,你好煩!」
 
老公點睇:老婆最愛無限loop,相同內容講幾百萬次,聽到都覺得煩!
 
老婆點睇:和老公相處時間有限,想講多兩句,對方不但無心聽,仲話自己煩!
 
給老公的建議:和老婆交談時,盡量保持眼神接觸,別讓她以為你發呆;如對方仍無限loop,可稍作回應,表示你有留心聽。
 
給老婆的建議:老公漫不經心,可能是他已聽過一樣的話,或者純粹好攰,對方少少抖氣位啦!
 
 
2. 「我唔明你嬲咩囉!」
 
老公點睇:上一秒歡歡喜喜,下一秒就無端端發老脾,最恐怖係老婆又唔肯講自己衰咩,齋面黑,點估呀?搞到下下提心吊膽 。
 
老婆點睇:才嬲完無幾耐,老公又重覆犯錯,竟然仲問自己嬲咩,簡直係火上加油!
 
給老公的建議:開口問老婆嬲咩之前,可先諗諗大家相處經歷,話唔定能搵到線索。再諗仍然無頭緒的話,跪底講句:「我唔想你嬲我,可以話我知點解你唔開心嗎? 」點都好過繼續搜索地雷。
 
給老婆的建議:健康關係始於溝通,老公踩到自己底線,唔一定要玩冷戰或者破口大罵,試冷靜告訴他你點諗,俾少少時間對方改善。
 
 
3. 「唔好成日管住曬啦!」
 
老公點睇:屋企事無大小都要管,就連同朋友出街都要問長問短,詳細過審犯,好煩啊!
 
老婆點睇:因為擔心,先問多幾句,竟然被老公嫌棄,既激心又傷心。
 
給老公的建議:老婆關心你,係因為你係佢老公,唔通你想佢關心第二個男人咩?想佢「管」少啲,不如先自動將行程 「備定案」,減少疑慮,她自然唔會多問。
 
給老婆的建議:男人天生不愛被管束,越問得多, 越覺得煩,越煩就越逃避,越逃避你越想問…...惡性循環,完。學習信任老公,留返啲私人空間俾佢,反而令佢有更多話題同你分享。
 
 
4. 「你係咪m到?」
 
老公點睇:老婆心情陰晴不定,突然黑面,一定係m 到!
 
老婆點睇:老公做錯事,仲問我係咪 m到,激死人!
 
給老公的建議:女人嬲豬唔不一定係m到,想知道老婆點解發火,男士們可嘗試同對方溝通,例如問:「你唔開心我好心痛,可唔可以話我知有咩令你唔開心?」
 
給老婆的建議:黑面同發脾氣解決唔到問題,有時候畫公仔真係要畫出腸,等老公明白自己不滿,無謂自己傻更更嬲一餐,老公其實唔知你嬲咩 。
 
 
5. 「我阿媽唔會咁煮/咁做囉。」
 
老公點睇:細細個習慣阿媽打理家頭細務,一時三刻不習慣老婆方法,評論一下,唔使死呀?
 
老婆點睇:辛辛苦苦照顧頭家,最後被老公嫌棄,仲要同奶奶比較,好委屈啊!
 
給老公的建議:有人做埋就咪多聲氣,打理屋企唔容易,挑剔老婆不如阿媽之前,不妨欣賞佢有幾努力,幫忙分擔家務;表達意見無可厚非,但千萬唔好將老婆同阿媽比較。
 
給老婆的建議:多留意老公生活習慣,儘量迎合合理要求,同時等佢知道夫妻該共同承擔家務,咪俾佢指指點點做大爺。
 
 
6. 「你同你阿媽一樣㗎!」
 
老公點睇:老婆性格及(尤其係)缺點同外母一樣難頂,果然係兩母女。
 
老婆點睇:有咩唔滿意都好,唔好拖埋我阿媽落水!
 
給老公的建議:子女維護父母,天經地義,你都唔鍾意話你阿媽啦,人同此心,你呢句說話唔單止令老婆難堪,仲反映出你唔尊重外母。表達不滿唔等於要「撩交嗌」,更無必要牽扯到對方屋企人,心平氣和以事論事講出問題就夠。
 
給老婆的建議:鼓勵老公直接講出有咩滿意,夫妻定期交換意見,有助反省和改善關係中不足之處;此外,夫妻間亦可以達成君子協定,要尊重對方家人。
 
一句到尾,溝通最緊要。大個人喇,要冷靜、理性地表達意見,說話講出口就收唔返,況且對方唔係你仇人,係你愛人,點解要傷佢心呢?

Text/Rachel

(圖片來源:互聯網)
 

24471 views