【港式執媽】小小生命鬥士!

最近執媽遇到個生命鬥士,佢係一個出咗世一日嘅BB!
 
原來佢嘅生命係幾經辛苦先執到返嚟,呢個媽媽講返佢嘅經歷畀我聽,再望住懷中好似舊綿花咁柔軟嘅BB,真係忍唔住滴下開心嘅眼淚。
 
當日呢位媽媽恨咗兩年,終於俾佢陀到BB,對住親戚朋友都三緘其口,怕BB小器會陀唔穩!
 
終於過咗三個月可以上網公布喜訊,可能呢個世界真係有「小器」呢樣嘢,BB去到13週幾嘅一晚,突然喺媽媽瞓瞓下覺期間「早期穿水」。
 
須知道,香港法例規定,24週以下嘅BB唔算係正式嘅 「胎兒」,只會被當做「胚胎」。23週以下突然肚痛穿水作早產的話,真係只可以自求多福。
 
喺某啲醫院,23週至24週期間,醫生會同父母商量,到底要唔要搶救,但當然後續嘅發展係令人擔心㗎啦!而過咗24週,佢已經係一個「胎兒」,醫生一定會全力搶救㗎!
 
而今次呢個13週就穿水嘅BB主角,真係一個好少數見到嘅例子,真係嚇到媽媽鼻哥窿都冇肉呀!
 
確定真係穿水之後,根本冇嘢可以做,只會當作小產,可以做嘅係畀抗生素預防媽媽感染、照住超聲波去監察BB胎水狀況同發育,直至自然/手術排出。
 
呢位媽媽當然喊到傻咗啦,但佢話穿咗水後望住個超聲波,見到BB個心仔仍然強而有力咁跳緊!手腳繼續郁,胎水亦冇明顯咁少到,好似喺度叫緊媽媽要努力唔好放棄佢咁呀!聽到呢到,執媽都眼濕濕呀!
 
就係咁樣,日復日,不斷瞓床休息,放棄工作,媽媽同BB渡過一個又一個難關,BB繼續長大,胎水仍然健在!直到最後自然作動見紅穿水肚痛,BB足月順產出世!
 
好感動,可能係因為神蹟或者滿天神彿保佑,可能BB只係穿咗兩層胎膜嘅其中一層,可能個窿只係好細之後自己慢慢合返埋,無論咩原因都好,BB,執媽真係好欣賞你!咁細粒就已經經歷咁多大挑戰,而你都一一跨過!(最厲害嘅係抽血驗發炎指數都完全正常)希望你將來遇到任何困難都會好似出世前咁勇敢,你媽媽都會一直做你最強後盾!
 
其實由知道懷孕一刻,每個父母都只係希望BB可以健康正常成長,但往往懷孕就好似要過五關斬六將咁每關KO,執媽祝願你哋每一位都平安順利渡過懷孕期,生個健康BB,你哋或者朋友有冇好驚險嘅懷孕過程想分享?話畀執媽知啦!

感謝港式執媽授權分享內容。
更多產科知識,即上「港式執媽」專頁:https://www.facebook.com/pg/hkmidwife

16110 views