解構產科神秘面紗之一──入院做啲咩?

好多新手媽媽都是年輕貌美身壯力健,從來未因病入過醫院的,生BB可能成為佢地第一次入醫院嘅原因。醫院對佢地嚟講就好似蒙上一層神秘嘅面紗,到底入咗院之後會發生咩事呢?就等執媽分幾篇講解一下啦!
 
滿22週可直接入產房
懷孕期間,只要滿22週 (部分醫院20週),孕媽媽有咩唔舒服都可以直接入產房睇醫生,唔需要再等急症室,當然係指緊急狀況啦,例如肚痛見紅穿水、未足月嘅出血(產前出血)、BB胎動減少、跌倒(執媽遇過30幾週嘅孕媽媽碌落樓梯)等等,就可以直接搭的士,直接入產房!
 
穿水唔好叫救護車?
如果冇生命危險,唔建議叫救護車,因為救護員嘅指引係要送患者去最就近嘅醫院,未必幫到孕媽媽。
 
舉個例,如果你住荃灣叫救護車,就只可以送你去仁濟醫院,即使知道仁濟冇產科都好,即使知道你個BB已經好危險都好,都唔可以直接送你去有產科嘅醫院㗎!新聞都有報導過,但好多時一穿水一驚,港爸媽就緊張到唔記得咗,下意識就叫救護車,咁樣係會延誤咗孕媽媽見產科醫生嘅時間㗎!
 
入院檢查做啲咩?
好喇!終於到醫院喇!如果有需要,例如子宮已經有規律收縮、穿咗水但沒有胎盤前置,而又唔係未足月的話,助產士會用手檢查陰道,所以入院前都要做好被檢查嘅心理準備呀!
 
同埋入醫院之後,為咗確保母嬰安全,一定會留院觀察一晚㗎,所以唔好入院做完個檢查嗰一刻冇問題就扭計要出院呀,每次入院都帶定走佬袋就最安全喇!
 
感謝港式執媽授權分享內容。
更多產科知識,即上「港式執媽」專頁:https://www.facebook.com/pg/hkmidwife

更多精彩內容:【特集】生B懶人包

33479 views