迪士尼夜間遊玩指南｜1. 探險世界

首先，夜間第一站可以考慮去「探險世界」欣賞迪士尼超過200種燈飾！由船長帶領大家感受一場神秘森林夜間冒險，感受沉寂嘅流水，成個人都特別舒服平靜，絕對係同日間截然不同嘅享受嚟！
 

迪士尼夜間遊玩指南｜2. 笑匠歡宴坊

玩完刺激嘅，可以食返餐晚飯平靜下個人先！可以去「笑匠歡宴坊」享受美食之餘，仲有節慶般嘅美景同奇妙嘅燈光樹下感受夢幻嘅氛圍，食完可以喺樹下影下親子相或者情侶相，絕對係一個打卡景點嚟。
 

迪士尼夜間遊玩指南｜3. 灰姑娘旋轉木馬

夜間入城堡又點可以少得必去完美打卡位「灰姑娘旋轉木馬」呢？不過呢個童話般浪漫嘅景點唔係情侶嘅專利，一家大細去影個畫面仲靚添～夜晚喺3328盞彩燈打造而成嘅旋轉木馬下影低家人享樂嘅時刻，就好似夫妻帶住愛情結晶嘅小朋友入去童話世界過幸福生活一樣，十分唯美。
 

迪士尼夜間遊玩指南｜4. 小小世界

相信大家同小編一樣都好中意小小世界外牆極夢幻唯美嘅鐘樓，每次去到必打卡！ 夜晚過後，色彩變化更豐富添。鐘樓每隔15分鐘打開，並轉出18個代表唔同國家超生動嘅玩具木偶巡遊，象徵多元共融，真係感受到咩係「世界真細小」呀！
 

打卡小貼士：乘坐小小世界時，可以用四方形的水晶鏡片折射出五顏六色的光線，令小小世界於鏡頭下變得色彩繽紛，影出花款多多嘅靚相。
 

迪士尼夜間遊玩指南｜5. 奇妙夢想城堡

最後，作為迪士尼樂園嘅中心地標，「奇妙夢想城堡」將會化身為「迪士尼星夢光影之旅」嘅畫布，大家可以喺夜間匯演前，通過城堡通道感受下一盞又一盞華麗水晶吊燈，仲會見到愛洛公主（睡公主）嘅三位仙子教母揮灑奇妙星粉，為城堡注滿奇妙活力！
 

打卡小貼士：
大家可以利用小鏡子，照射出城堡嘅倒影再按下快門，於夜晚嘅燈光下別有一番風味！
 

都可以用迷你水晶球將整個城堡收入水晶球內，影出嚟成張相都特別唔一樣~
 

迪士尼夜間遊玩指南｜煙花匯演終於回歸 重現迪士尼經典

 
咁多年冇煙花睇，實在係好冇癮！ 不過唔使擔心，大家好快就有得睇。迪士尼煙花匯演將於2022年6月18日正式回歸，闊別4年嘅煙花匯演。
 
 

迪士尼今次真係落足心機，運用先進嘅光雕投影技術，水幕投影同煙火效果為城堡增添活力，迪士尼粉絲今次真係有福啦！
 

今次「迪士尼星夢光影之旅」全程共20分鐘，會分成7個章節，以近40個經典迪士尼同彼思 經典故事，以絕美煙花同奇妙經典嘅樂曲傳達人生六個重要階段，帶大家穿梭自己人生唔同時期嘅縮影，啟發美好嘅回憶！
 

迪士尼夜間煙花匯演｜I.  誕生之時

第一章代表人生旅程展開。小生命誕生，代表人初始最天真、純潔的時刻。呢一幕入面，你會見到卡娜抱著小泰山慶祝生命的誕生，來自《小飛象》的嬰兒大寶安心於媽媽嘅長鼻子裡盪來盪去等片段，每一個都提醒緊觀眾人生最初嘅模樣，唔好忘記一開始嘅純真。
 

迪士尼夜間煙花匯演｜II.  無憂之時

小孩子呢個年紀係最無憂無慮，冇太多事情煩惱，盡情玩、歡樂和友誼就係佢哋嘅全部。呢一幕代表嘅作品就有小飛俠同小珠喺夢幻島上嬉戲，《魔雪奇緣》安娜愛莎一齊於王國冰天雪地中堆雪人，以及《獅子王》小辛巴喺榮耀之地學做國王嘅天真模樣。睇見呢幕真係會忍唔住諗返起過去自在嘅自己。
 

迪士尼夜間煙花匯演｜III.  蛻變之時

當大家從孩童蛻變為年輕人，就開始放低兒時嘅認知，尋找真我。「蛻變之時」一幕慶祝佢哋生命中嘅轉捩點，提醒大家走嘅每一個方向，都會改變人生。觀眾會跟隨《魔海奇緣》慕安娜一齊衝出海洋尋找自我，同《優獸大都會》嘅朱迪嘗試以各種方式出人頭地等等。
 

迪士尼夜間煙花匯演｜IV.  永恆之時

第四章代表我哋搵到伴侶嘅浪漫旅程。《阿拉丁》茉莉公主同阿拉丁喺星空下坐住魔毯翱翔城堡，仲有《魔髮奇緣》中長髮公主喺千盞浮燈籠罩下墮入愛河。每一幕都展現出初戀時嘅羞澀同清純，係一段好值得紀念嘅時光。
 

迪士尼夜間煙花匯演｜V. 考驗之時

人生一定唔會事事順暢，挑戰同障礙總會出現，我們不得不面對呢啲考驗。呢一幕呈現出迪士尼角色點樣受到惡人引誘同威逼，想要令佢哋偏離正軌放棄夢想。好似《獅子王》施卡用鋒利爪子佔領榮耀之地，《雪姑七友》中邪惡皇后用毒蘋果誘惑白雪公主等場景。
 

迪士尼夜間煙花匯演｜VI. 懷緬之時

「懷緬之時」係想令大家回顧出現自己生命中嘅唔同貴人。正如《玩轉極樂園》中，米哥受到佢嘅曾曾祖父阿德啟發一樣，要感恩我哋有生命中好重要的人照顧著，啟發人生。
 

迪士尼夜間煙花匯演｜VII. 活在當下 時刻銘記

最終章中，原創樂曲《Love the Memory》旋律同歌詞優雅地昇華整個表演，道出大家所經歷嘅旅程同分享過嘅時刻，提醒大家好好珍惜享受人生中的每個重要時刻，全情投入，活在當下。人生每段回憶都長存我們心中，鼓勵我們成為最好的自己。

睇完成個過程，小編人生走馬燈彈咗出嚟，雖然旅程已到尾聲，但大家嘅人生都係進行中。希望大家都能活出自己想要過嘅人生，製造更多美好回憶！
 

迪士尼夜間遊玩指南｜晚間必備行程

嚟迪士尼玩就唔可以少得周邊商品。為配合匯演主題，樂園同酒店商店推出一系列商品，包括發光飾品，及有特別反光效果嘅 T恤 ，仲有可互換發光蝴蝶結頭箍，可以按個人喜好換唔同款式嘅蝴蝶結，超有個人化特色。可以同伴侶親人通過紀念商品，回味精彩演出。
 

「迪士尼星夢光影之旅」系列

迪士尼星夢光影之旅閃亮扣針	HKD$29
迪士尼星夢光影之旅明信片	HKD$29
迪士尼星夢光影之旅米妮頭箍	HKD$399
迪士尼星夢光影之旅成人T恤	HKD$289
迪士尼星夢光影之旅明信片及貼紙套裝	HKD$49
迪士尼星夢光影之旅泡泡相機玩具	HKD$249
迪士尼星夢光影之旅發光棒	HKD$99
迪士尼星夢光影之旅發光頸鏈	HKD$99
迪士尼星夢光影之旅限量版徽章	HKD$229
迪士尼星夢光影之旅口罩	HKD$59

 

迪士尼星夢光影之旅
地點：香港迪士尼樂園奇妙夢想城堡
*場次：共20分鐘，每星期4-5場
#時間：晚上7:30或8:30

*夜間匯演將於2022 年6 月18 日-8 月14 日期間，逢星期一、五、六、日每晚上演一場。2022 年8 月15 至28 日期間，每星期中的五晚 (除星期二及四) 上演一場。有關最新場次安排，賓客可查閱香港迪士尼樂園官方網頁。
#時間視乎樂園當天的閉園時間而定，賓客可以參考手機應用程式上的時間。

---

Text_Bess