順產 VS 開刀大比併｜一文睇清幫你揀個適合自己嘅生B方法！助產士話你知順產與開刀的好處

順產優點
1. 一般失血量較少
順產失血500ml 已經叫多，但剖腹產可能會有1000ml 以上㗎！當然順產我都見過失血好多的，但一般係順產少啲。
唔好睇少失血量呀，對好似我呢啲成日面青青長期貧血樣的人嚟講，保住嗰少少血可以買少支唇膏喇，而且產後需要輸血機會都較少，復原行得走得都快過人！

更多精彩內容：【特集】生B懶人包

2. 做到「零傷口」生產
好多媽媽都擔心順產需要剪會陰，但今時今日我們接生的時候都傾向唔會剪會陰傷口，其實好多研究指岀會陰傷口係無助於預防嚴重會陰破裂，反而如果媽媽配合得好，加上會陰嘅肌肉彈性夠，順產係可以一個傷口都沒有，連第一胎都可以做到！

更多精彩內容：【特集】生B懶人包

3. 無須承擔手術及麻醉風險
剖腹產都係以半身麻醉為主，半身麻醉之後的感覺其實都幾差，雙腳感覺不是我的，俾姑娘搬嚟搬去，而且畢竟係要打麻醉針去到脊椎神經，係有一個超級少見的機會會影響到之後下半身活動。
做手術後會爆子宮係少見，但其他可能的風險例如腸塞、盆腔黏連以致肚痛，或者做手術時影響到輸尿管等都係有，而順產就可避過呢一切！

更多精彩內容：【特集】生B懶人包

4. 有利BB呼吸
喺你陣痛的同時，唔好忘記你的BB喺你肚入面會被擠壓，可能你會覺得BB好辛苦（其實冇人知，因為冇一個BB答到我），但其實係用緊一個最自然方法叫醒佢，同時擠壓係會將BB肺部的胎水迫岀，同刺激BB岀世後醒目呼吸，減少有"wet lung"情況岀現。
（Wet lung：個肺好濕，會影響呼吸！）

更多精彩內容：【特集】生B懶人包

5. 有利哺乳
決心餵人奶嘅媽媽就注意喇！順產時會有一種「催產素」的荷爾蒙岀嚟，催產素當然係用嚟催產啦，但另一種作用係分泌乳汁，加上順產復原快，相對地順產媽媽喺餵母乳方面係會有優勢！

更多精彩內容：【特集】生B懶人包

6. 有利惡露排岀
無可否認地順產之後下面會鬆咗，但正正係鬆咗個子宮頸，惡露排岀會更順利，加埋餵人奶更好，有助產後復原。
 
7. 價錢平啲
公立順產唔使錢㗎！私家就要睇個醫生收幾多囉。

更多精彩內容：【特集】生B懶人包

剖腹產優點
1. 一字記之曰──快
講到剖腹產就係如果媽媽或BB有危險，最快可以生產應該就係剖腹產。除非媽媽唔係第一胎，又十度全開，BB頭就喺門口，咁輔助陰道產會快啲，但係產科急症應對上剖腹產絕不可少！

更多精彩內容：【特集】生B懶人包

2. 一切就在掌握之中
其實我諗好多人，包括媽媽同婦產科醫生都傾向鐘意剖腹產，就係因為呢個原因，信命理的你，差一個時辰就一個時辰！係龍B定蛇B真係差少少就少少，但剖腹產則可以控制年月日時，想幾時生都得！
而醫生都一樣咁覺得，順產多變數，剖腹產可以避免好多風險，例如難產、高程度會陰傷口、產後失禁，少數有機會盆腔器官下垂。

更多精彩內容：【特集】生B懶人包

3. 無須經歷陣痛
呢一點真係大部分媽媽選擇剖腹產嘅原因，陣痛閒閒地第一胎都10個鐘，甚至係幾日幾夜，痛到人都灰個仔都未岀嚟，做手術係生完痛，但起碼知個仔幾時岀世呀！

更多精彩內容：【特集】生B懶人包

感謝關你Nurse事授權分享內容。
更多懷孕、分娩資訊，即上「Nurse事」專頁：https://www.facebook.com/urnursecare/