臀先露（Breech Birth) 係指BB個頭仔唔識調頭，戴個頭盔講定先，原則上breech係可以順產㗎！
唔係所有臀先露嘅BB都一定需要開刀，有一啲仍然好細週數，媽媽陰道盤骨夠位生；有啲孖胎第二個BB臀先露的話，仍然可以透過某啲手勢協助佢出世，亦有啲技巧好純熟嘅醫生係好有信心去執臀先露BB，佢仍然可以嘗試。
但咁做有一定風險，例如出到個身出唔到個頭，出到一隻腳出唔到另一隻腳，出到一隻手出唔到另一隻手等等，甚至有機會導致BB難產死亡。試問係現世代嘅香港，有冇人接受到駝左40週既BB因為難產死亡呀？仲有冇醫生夠膽好有信心咁講話「Breech？等我嚟」？咁相信一定有既，話時話，識嘅話可唔可以介紹我識？
不過我都見過順產嘅breech，平時去到某個週數，BB頭就會自動轉向下，達到一個正常嘅體位去出世，但係往往會有某啲原因，令到頭仔轉唔到落去，而造成屁股向下，例如：
- 孖胎
- 胎水多（或可能因妊娠糖尿病導致胎水過多）
- 子宮有肌瘤
- 子宮異常形狀
- 胎盤前置
- 盆骨狹窄
- 更大部份嘅原因係，冇特別原因。
道聽塗說聽返嚟，話說有啲 senior 表示，以前嗰代嘅助產士好勁㗎，摸到pat pat向下，只需要大手一撥，頭仔自動轉返下面，唔使用藥唔使儀器，發展到而家，有啲媽媽為咗唔想經歷生仔十級痛，或者爆會陰，反而聽到BB臀先露要開刀會更加開心，因為可以好平咁係公立醫院開刀。
你知啦，喺私家醫院開刀動輒幾萬落樓，未計有任何complications、需要入ICU、早咗作動、需要半夜開刀等等等，全部都係錢！
畀在係我，BB足月臀先露的話，我都唔知開心定唔開心。雖然身為執媽，但我都知道有啲會陰注定會爆、有啲盆骨注定好難生、有啲子宮頸注定好難開，你唔試生過都唔知到底自己生唔生得出。
畀在係你又會點揀呢？明知breech有危險都堅決要試順產？定一知道係breech諗都唔諗就決定開刀？定去試體外頭位轉移術呢？
感謝港式執媽授權分享內容。
更多產科知識，即上「港式執媽」專頁：https://www.facebook.com/pg/hkmidwife
更多精彩內容：【特集】生B懶人包
