香港比較少見到加加大碼的米芝蓮BB，不過反而學童肥胖情況較為嚴重。
平時見客，久不久都有家長帶小朋友來見面，有些想子女「大隻」，有些卻怕子女過肥會「唔健康，俾人笑」。
要幫小朋友體重管理，需要由BB時期開始了解：出世時是否已經是大碼B？BB時期是母乳餵哺還是飲配方奶粉？開心/發脾氣時，嗲地媽咪通常如何氹你/罰你？平時喜歡睇電視/YouTube還是出街玩？屋企最常煮的餸菜是什麼？
簡單幾個問題，已經追溯到小朋友致肥的大概原因，除了遺傳因素，大部份都是後天因素，而這些因素很快就可以行動作出改變……如果父母願意的話。
1. 增加活動量
要令小朋友投入玩耍，父母都要投入陪他們玩。我每次帶小朋友去公園，扮恐龍陪他們追逐，總會吸引到一堆小朋友慢慢加入戰團，而他們的父母則好多時在一旁玩手機。
2. 不以零食作獎勵
當然用零食或買禮物作獎勵是最快最直接的方法，如果不以這兩種方法作獎勵，那父母是時候應該發揮多點創意啦。小玩意豐儉由人，你肯花時間陪他們玩最重要。
3. 為食物多花點心思
小朋友貪新鮮，喜歡顏色鮮豔又賣相吸引的食物。不妨於食材，配搭多花點心思，不同顏色的新鮮蔬果，永遠勝於加工零食。
4. 唯有一樣是絕對不建議的，就是叫小朋友捱餓節食，因會直接影響小朋友發育成長。
注：文章標題經編輯修訂，按此查看原文
感謝營養師李杏榆授權轉載內容。
更多育兒及營養資訊：https://www.facebook.com/AnnieLeeDiet
