家居防疫貼士｜化學博士K Kwong分享6大家居消毒貼士｜親自回答家居消毒疑惑Ｑ＆Ａ

香港大學化學系博士鄺士山（K Kwong）最近就於Facebook專頁分享多項家居消毒貼士，針對不同家居用品的正確使用清潔劑方法，一些消毒劑的代用品，以及在網上社交平台回應網友關心的家居消毒疑惑，小童及寵物家庭的注意事項等等！

家居防疫貼士｜K Kwong分享6大家居消毒貼士

家居消毒貼士｜#1 金屬表面

金屬表面可用60-90%酒精（包括乙醇／異丙醇／isopropyl alcohol／ethyl alcohol／isopropanol ），而所有含水的清潔消毒劑都不宜用於金屬表面。

家居消毒貼士｜#2 非金屬表面

非金屬表面以1：99漂白水消毒，用來洗手都冇問題，而在帶菌者使用廁所後，可用1：49漂白水消毒，亦可選用稀釋（通常1：24，建議跟說明書指示）的PCMX（氯二甲酚）滴露消毒劑，稀釋時記得開窗通風，開完盡快1至2日用完，並要注意漂白水不適用於有小童及寵物地方。

家居消毒貼士｜#3 皮膚

K Kwong指經常使用酒精會溶解手部皮膚脂肪，導致主婦手，故建議使用有添加潤膚劑的酒精產品，或者是季銨鹽、番梘水、梳打粉水等。

家居消毒貼士｜#4 衣物

K Kwong建議每日穿著的衣服可利用低噴量蒸氣熨斗、曬太陽等方法消毒，或以酒精、半濕布抹一抹表面，至於鞋類則「用乜都得」。

家居消毒貼士｜#5 消毒劑代用品

以大約手指尾份量的彩漂粉開半公升水，可作為漂白水的代用品；而番梘水及梳打粉水亦可同樣以大約手指尾份量開半公升水，作為較弱的消毒劑，不過效用就不及漂白水、酒精快速及強效。另外，季銨鹽、苯札氯銨是常見的無酒精消毒劑，可用於皮膚，價錢較便宜，但效用依然是不及酒精、漂白水或PCMX。

家居消毒貼士｜#6 勿用霧化器

K Kwong更特別提醒消毒時盡可能不要使用電動噴霧器，只可用手動噴霧器，而「霧化器」就絕對禁止，亂用霧化槍或令肺部纖維化，同時使用不當亦會引起火災，因此必須多加留意。

家居防疫貼士｜K Kwong回答家居消毒疑惑Ｑ＆Ａ

Q：如果屋企有2歲小朋友，用1:99漂白水全屋清潔有危險嗎？
K Kwong：建議用番梘水

Q：確診患者沖涼時應該注意什麼？
K Kwong：如果唔係天井窗，沖完涼開抽氣，再用1：99消毒

Q：請問有咩方法可以消除紙箱表面病毒？
K Kwong：可以用濕布漂白水抹

Q：請問霧化槍用消毒火酒的話安全嘛？
K Kwong：會火燭

Q：請問廚房漂白水可代替一般漂白水消毒嗎？
K Kwong：都可以消毒，不過要留意：1. 廚店漂白水加咗小量「哥士的 NaOH」方便除油污。2. 有效成份「次氯酸鈉 NaOCl」比洗衣漂白水少。

Q：殺菌消毒洗衣粉有用嗎？
K Kwong：唔好迷信嗰啲所謂「乜乜殺菌消毒洗衣粉」。其實你用洗衣粉洗完衫後，嗰啲細菌病毒會被水沖走。正如你用番梘洗手果陣大部分細菌都係被水沖走。所以冇必要買嗰啲有乜乜殺菌消毒劑洗衣粉嘅，因為有可能嗰啲消毒劑殘留喺件衫度刺激皮膚。當然如果你選擇要買，就一定要買大牌子安全啲！

Q：如果gortex 啲外套，出完街番去想消一消毒，用咩會好啲？
K Kwong：我會放去曬太陽

Q：如果想清潔患者瞓過嘅床，應該點消毒？用1：99噴床褥再吹乾？
K Kwong：只要洗床單
 

教你自製消毒潔手噴霧｜溫和不傷手小孩適用

K Kwong在電視節目中曾分享兩款低成本又能有效殺死病毒的消毒噴霧做法。

方法一：一個手指頭份量的梳打粉＋200毫升水

梳打粉加水的做法簡單，原理是透過鹼性溶液令病毒外殼的脂肪溶解，並無毒性，對皮膚亦沒有大刺激性！即使飲用都不怕，可說明其溫和的程度。雖對比起其他消毒方式會『較弱』，但足以消滅手上的新冠肺炎病毒，不用太執著比例，主要目的為溶液呈鹼性

方法二：一個手指頭的彩漂粉＋100毫升水

K Kwong在節目上用到花王彩漂粉，如果想揀選其他品牌可以留意有沒有一個名為「過碳酸鈉」（Sodium percarbonate）的成分。消毒效能來說，彩漂粉會比梳打粉強，因為除了鹼性作用，更多了氧化性的作用，但就不如梳打粉般溫和，也要注意噴霧瓶不可選用透明，避免陽光照射分解有效成分。

兩款潔手噴霧建議製作完成後一至兩日內用完，就算未用完都需要更換，兩個方法的成本都相當低，所以家長都不用吝嗇使用！

資料來源：Facebook@DrKKwongChem