【唐氏綜合症篩查】SafeT21同NIFTY有咩分別?

上回講到,除咗公立醫院提供個個都有得做嘅唐氏綜合症篩查之外,宜家仲有另一啲非入侵性檢查可以選擇,最常見就係SafeT21同NIFTY,但呢啲檢查政府係無提供嘅,要自費㗎!
 
首先又先講明,呢啲測試都係一種篩選檢查,並未可以百分之一百確診到唐氏綜合症!但佢哋的準確度比公立醫院唐氏綜合症高得多,達到99.x%,所以我諗好多準媽媽都十五十六,唔知做好唔做好,又唔知揀邊款好。
 
偷偷地話你知,其實SafeT21同NIFTY係同一種技術,即係佢哋係一樣嘅,原理如下:
 
懷孕期間,媽媽同BB的橋樑就係胎盤同臍帶,媽媽同寶寶的血並無直接接觸,但BB成長過程中,會有一小部分的遺傳基因DNA經胎盤同臍帶入到媽媽血流。
只要抽取媽媽的血,再比對上面提及的DNA「找不同」,就可以快速得到胎兒的DNA,從而去化驗BB有無DNA染色體異常,明白原理之後就會知道呢個檢查準確度好高,亦可以由此搵到除唐氏綜合症以外的常見DNA問題,例如愛德華綜合症(T18)、性染色體問題等等。
 
咁NIFTY同SafeT21有咩唔同呀?
 
其實技術係一樣,抽血個個都係咁抽!(俾個靚醫生抽血唔痛就另計呀吓) 不同在於化驗地方同老細,佢哋一個係香港驗,一個係美國驗!
 
我無收NIFTY或者SafeT21錢,如果你問我驗好唔驗好,我會話睇能力負擔同自身風險吧!驗一次唔少錢,都$6000起跳,$6000可以買好多件BB衫,但如果風險高,例如高齡產婦或者公立醫院篩查高風險係值得一做!畢竟佢準得嚟又減少咗傳統診斷方法的流產風險!
 
如果覺得用幾千蚊買安心好抵,就10週後可以去做,做完SafeT21或NIFTY唔需要做公立醫院嗰個!至於揀SafeT21 定NIFTY,都係講個「信」字,覺得信得過就揀嗰個!

感謝關你Nurse事授權分享內容。
更多懷孕、分娩資訊,即上「Nurse事」專頁:https://www.facebook.com/urnursecare/

更多精彩內容:【特集】生B懶人包

50949 views