【母乳媽媽】教你正確餵奶姿勢 (一)

媽媽可能成日聽到我講「埋身埋得好,好過你搵任何奶泵/人幫你清空乳房」。的確,「埋身食奶」喺「餵人奶」上係最為重要嘅事!如果媽媽用一個正確姿勢餵BB,可以幫助乳房任何位置嘅塞奶都得到改善,個有效程度係明顯餵前摸落去一粒粒、刺痛,變到柔軟舒服。
 
但係知易行難,邊個唔知埋身餵最好咩?都要BB肯埋身,個口肯張開先得㗎!

早幾日執媽去聽人奶講座,醫生仲致力研究點樣幫助下巴短、脷根短嘅BB學習埋身!真係好專業,執媽都學到少少嘢㗎!大家想知可以問我。
 

首先要學識睇,點為之正確BB食奶樣 (正確含啜)
1. BB面又圓又漲
2. 身貼身,下巴貼乳房(重點!)
3. BB嘅頭、身、腳成一直線!唔好要佢擰側個頭食半個鐘奶
4. 上下唇張大外反,下唇含住大部分乳暈
5. 吸啜深而慢、有節奏及連貫性
6. 乳頭唔會損唔會痛
 
無論用咩姿勢餵奶,都應該做到以上所講嘅重點!
 
姿勢方面,我最推薦用交叉搖籃式餵初生BB,因為佢地啱啱嚟到呢個世界,食奶雖然係本能,但對好多BB嚟講都係一大挑戰,控制口腔肌肉其實係好難㗎,

呢個姿勢就好似左手捉住佢個頭同頸,右手就捉住個乳房,好似係搵個目標去俾BB食咁。
 
重點:同BB身貼身,唔好包到佢成隻粽咁,佢隻手要攬住你而唔係隔住喺你哋中間。
 
注意:新手媽媽嘅乳頭好幼嫩,唔係人人都經得起一日10次、每次半個鐘嘅吸啜,所以少少嘅距離對媽媽乳頭嚟講已經係天堂同懸崖咁遠。
 
下次先講另外嘅姿勢,以上全部都係我嘅肺腑之言,因為成日見到新手媽媽被啜損個乳頭,真係好慘,而且俾BB咁啜法,真係好痛㗎!
 
只要你唔係打開晒BB嘅包被,唔係同佢身貼身,俾佢隻手/膊頭阻住你哋之間,包保你乳頭一定損!

萬試萬靈,唔信你試下呀嗱!傻豬!唔好以「頭」試法呀!

感謝港式執媽授權分享內容。
更多產科知識,即上「港式執媽」專頁:https://www.facebook.com/pg/hkmidwife
更多精彩內容:【特集】母乳媽媽加油站

34825 views