解構產科神秘面紗之二--姑娘摸乜嘢?

上回講到,產婦入院之後,助產士會用手檢查陰道,唔好睇少呢個檢查,原來可以摸到好多嘢㗎!
 
初產婦開始作動的話,子宮會有規律收縮,而子宮頸會首先變薄,到薄到好似紙一樣先至會開度數。
 
但係對初產婦嚟講,變薄呢個過程可以話係十二分之咁漫長!子宮頸本身又厚又硬,仲有一舊好杰好杰(非常黏稠)嘅黏液封住中間個窿,懷孕期間keep住大約4cm厚,係一個把關嘅士兵,防止BB跌出嚟,又防止外來物質進入。
 
所以,有時姑娘檢查話「仲好長呀」,意思即係子宮頸仲未變薄晒。變薄呢個階段可以好耐,有啲媽媽會形容為「陣痛咗兩日喇」,但其實仲可以係好漫長,變薄完仲要等佢打開。好多媽咪子宮收縮痛,就好心急想知道開到幾多度,成日要求姑娘幫佢檢查,但每次檢查都會增加感染嘅風險㗎!所以如非必要我哋係唔會成日摸㗎!

同時間我哋會摸下BB嘅胎位,睇下到底係咪頭向下,再摸下佢嘅先露部位,即係頭殻頂、後尾枕、膊頭、屁股定手腳;同埋如果穿水嘅話,睇下會唔會摸到臍帶,有冇穿到胎膜,即係摸落到底係滑潺潺嘅胎膜定係鞋颯颯嘅頭髮,同時睇埋有冇胎水,如果有嘅係咪清澈定係混咗胎糞,如果有胎糞,咁有可能BB已經受唔住壓力焗到喺入面瀨咗臭臭喇!
 
其實除咗摸到頭仔之外,摸到其他嘢都會係唔同程度嘅驚嚇!好似執媽上次收咗個已經子宮頸全開嘅孕婦,穿咗水,一摸發現係屁股嚟嘅,拎返隻手指出嚟仲有胎糞㗎添,亦都聽同事講過一摸入去,BB隻手仔捉住同事隻手指,又有一摸係膊頭嘅!摸到呢啲咁特別嘅先露部位的話,就唔適宜等喇,唯有緊緊緊急入手術室見喇!

感謝港式執媽授權分享內容。
更多產科知識,即上「港式執媽」專頁:https://www.facebook.com/pg/hkmidwife

11598 views