有追開我page嘅媽媽都知道執媽係讀西方醫學，但同時相信中醫調理身體，仲會研究下啲香薰治療同埋花草茶，執媽就邀請到銀杏堂嘅中醫歐陽醫師同我哋分享下一啲產前產後知識，同埋上奶方法！
更多精彩內容：【特集】生B懶人包
1）清唔清胎毒好？
執媽：好多媽媽都關注清胎毒嘅問題，我哋助產士就唔會特別鼓勵，因為西方冇研究數據支持，最多只可以答你要足咗月先好飲清胎毒嘅嘢，咁請問下歐陽醫師又點睇「清胎毒」呢個問題？又係唔係人人都有需要清胎毒呢？
醫師：其實喺中醫角度，「胎毒」是指妊娠後期，產婦由於過分進補、經常食熱氣嘢或本身體質偏熱等因素，導致部分產婦身體處於燥熱狀態，甚至出現皮膚問題，例如紅疹、敏感、暗瘡等等。為預防燥熱狀態或皮膚問題「傳」畀BB，中醫一般會喺產前最後一個月，幫佢地清胎毒。
不過唔係每個產婦都適合㗎，如果本身體質偏寒，甚至偏虛，清胎毒就可能會出現不良效果。而且坊間清胎毒的方法五花八門，因此計畫清胎毒之前，最好問清楚註冊中醫先好服用呀。
執媽：唔唔！知道！各位媽媽唔好亂清胎毒喇！我收過好多媽媽話當日飲咗白蓮鬚水，當日就穿水加生埋個B喇！爭幾日先足月㗎！
更多精彩內容：【特集】生B懶人包
2）坐月沖涼得唔得？
執媽：古代冇熱水爐，產後媽媽沖涼可能會凍親，而現代我哋會鼓勵媽媽每日沖涼保持乾淨，餵BB都感覺好啲啦，只要注意盡快吹頭唔好凍親就可以喇！
唔知道中醫又點睇產後沖涼，或者係咪一定要用「熟水」先可以洗手呢？沖涼時係咪可以加啲藥材一齊去沖呢？
醫師：無錯！中醫尤其重視產後保養，產後調護對產婦日後健康有一定影響，所以中醫會建議產後媽媽用溫暖的「熟水」清潔身體。（ 「熟水」即是煲過的食水）。如果條件許可，更可以用藥材，如生薑、紅花、雞血藤等煲水清潔身體。
因為中醫認為產後婦女氣血虧虛，風寒濕氣容易趁虛而入，有些體質虛弱既媽媽，產後出現手腳關節痛，因此冰水，生水儘量少碰，冬天亦唔好赤腳落地。
執媽：嚟緊冬天生B嘅媽媽要留意喇！醫院係冇「熟水」畀各位洗手㗎，到時唔好問我拎，畀唔到你㗎！
更多精彩內容：【特集】生B懶人包
3）食咩有助增奶？
執媽：最多媽媽關注嘅問題嚟喇！除咗木瓜魚湯之外，到底食咩可以多啲奶水呢？
醫師：上奶食物湯水有花生雞腳章魚湯、花生豬腳湯、淮山清雞湯、椰子煲烏雞湯、絲瓜炒豆腐等等。
至於中藥湯水方面，如果惡露排清，則可以煲以下湯水飲用：
黃耆2錢、當歸2錢、圓肉3錢、杞子3錢、淮山5錢、通草2錢、王不留行3錢、瘦肉適量
提提大家，除咗上奶之外，都要注意保持乳汁通暢，防止乳腺炎，所以預備上奶食物的同時，可以加入適量通草同王不留行，幫助行氣通乳，反之如果乳汁暢順，則可減少使用。
其實每位媽媽有效的上奶食物不盡相同，人地食咗有效你未必一定得。尋找自己的上奶食物都好重要。
所以各位偉大既媽媽，唔好灰心，一定搵到你哋嘅上奶食物！
執媽：記住惡露未排清千祈唔好補身住呀！會引致產後大出血㗎！
更多精彩內容：【特集】生B懶人包
4）炒米茶小知識
執媽：炒米茶可以加啲咩藥材去幫助上奶呢？
醫師：炒米茶加入藥材應循序漸進，唔好太急住上奶。惡露未清前可以加紅棗，南棗，圓肉，杞子，淮山，陳皮等較溫和的藥材。
如果惡露已清可以循序漸進加入適量黃耆，黨參幫助上奶。
更多精彩內容：【特集】生B懶人包
5）補身食咩好？
執媽：醫師，其實你建唔建議媽媽們服食產後廿八方呢？好似買一pack嚟坐月好方便喎，又唔使諗食譜！
醫師：產後廿八方，其實只是按產後調理原則來制定的治療方案，並不是每個產婦都適合，因為每位媽媽體質及身體狀況都唔一樣。如果盲目服用，可能引起不適，或者影響飲人奶嘅BB。
執媽：無錯，中醫最講求辯症論治，而西醫講求assessment，又點會有一條方，可以乎合晒各位唔同體質嘅媽媽呢？有需要都係要先問下專業人士！
執媽：嘩！我今日真係學咗好多嘢呀！好多謝歐陽醫師百忙之中解答執媽嘅問題呀，我知各位媽媽仲有其他問題想問㗎，期待我哋出下集，或者等唔切嘅話，可以直接去搵歐陽醫師幫手㗎！
感謝港式執媽授權分享內容。
更多產科知識，即上「港式執媽」專頁：
https://www.facebook.com/pg/hkmidwife更多精彩內容：【特集】生B懶人包
