如果爸爸捱得過上一集講嘅場面，恭喜你！嚟到BB出世嘅一刻，爸爸可以剪臍帶喇！剪臍帶一刻好有意義㗎，不過唔係想像中一下就剪得斷㗎，條臍帶個樣就好似腸粉，但剪落難剪過橡筋㗎！入面有兩條靜脈一條動脈，不過剪落去唔痛㗎，keep住剪到斷為止就得㗎喇。
爸爸喺等緊嘅時候其實同媽咪一樣好心急嘅，見到媽咪痛得咁辛苦都會好想立刻搵醫生幫佢開刀，有時心急語氣就會重左，同醫護人員就會產生conflict㗎喇！要記住，醫護人員嘅出發點永遠都係為媽咪同BB好嘅，如果順產到，一定比開刀好！所以，放心交老婆仔女俾我哋喇！有需要開刀嘅我哋唔會等！跑去手術室跑得快過你添呀！
之後，好多爸爸都會指出，喺等緊嗰十幾個鐘入面，唔知可以為老婆做啲乜，等我俾啲tips你喇。
喺產房唔可以開電話㗎，因為驚電子儀器影響胎心聲監察機，所以係唔可以煲劇的！（我想第一個提倡待產可以煲劇！時間一定過得快好多！）
老公陪產貼士：
1) 不過可以播歌，最原始拎返啲mp3機入定啲你哋鐘意嘅音樂，一齊聽下歌。唉，香港嘅產科就係咁守舊㗎喇！期待第時可以陪產多元化啲喇。
2) 陪老婆傾下計，講下期待BB出世幫佢換片，講下期待影第一張全家福。
3) 某啲醫院推出咗香薰止痛按摩服務，由助產士教爸爸幫媽咪做back massage， 當然要睇當時忙唔忙喇！都好幫到減痛㗎！尤其係BB背脊向住媽咪背脊嘅痛苦胎位！媽咪腰骨真係痛到好似俾人打咁㗎！爸爸係出手嘅時候喇！
4) 帶定啲乾糧嘢食，因為有可能要等好耐。而好多時爸爸以為仲未生得，行開去食飯嘅時候，就係BB出世之時喇！所以爸爸不要離產房太遠喇！
5) 帶定把梳，老婆生完幫佢梳靚個頭準備影第一張全家福！呢張相呃like神物黎㗎嘛！一定要影到媽咪靚女啲㗎！如果遇到我嘅話，我一定會就住鏡頭，影爸爸大隻啲、媽咪細粒啲，同埋高炒㗎！期待下遇到我喇！
6) 背左以下呢幾句錦囊，必要時打開嚟用，包保你老婆愛死你，願意幫你生多幾個呀：
- 老婆我愛你，多謝你幫我生咗個咁可愛嘅BB。
- 老婆我以後會錫晒你同BB㗎！
- 老婆辛苦你喇！我愛你！
- 老婆！要咩禮物隨便講！乜都送俾你！
感謝港式執媽授權分享內容。
更多產科知識，即上「港式執媽」專頁：https://www.facebook.com/pg/hkmidwife
更多精彩內容：【特集】生B懶人包
