【助產士 vs 中醫師】坐月子小知識 (2)

之前執媽邀請咗歐陽中醫師一齊寫文章，同大家分享產後上奶食療，今次歐陽醫師不嫌其煩，又再幫我解答一啲產後常見問題呀！
 
上次有媽媽提出咗一啲問題，而呢啲問題都係我成日聽到，但西醫只會hea過咁答，因為始終西方醫學冇做過相關研究，即係冇證據顯示兩者有關，就冇辦法確切答到媽媽，但中醫就會有解答喇！
 
以下，睇下執媽加歐陽醫師又解唔解答到你哋嘅問題喇！

1) 點解產後周身痛？

執媽：好多媽媽都有產後周身痛嘅問題，腰骨痛、手指關節痛、膝頭痛等等，喺西醫嘅角度就覺得係懷孕時身體分泌Relaxin（鬆弛素），去幫媽媽嘅軟骨、筋腱等等鬆軟少少，可以畀BB出世時順利通過產道，所以有時關節會覺得鬆軟，唔知中醫又點睇產後骨痛嘅問題，同可以點保養呢？
 
醫師：產後周身骨痛這個情況其實並不少見，中醫稱為「產後風」。原因係產後媽媽多數處於「多虛多瘀」的狀態，即氣血虧虛或伴有瘀血未清，此時很容易外感風寒，導致身體各關節氣血不足或氣血不通，而產生關節疼痛。所以中醫強調媽媽產後要保養身體，避風寒，調暢心情，注意飲食。
 
產後初期可以煲薑水或溫性的中藥湯液嚟清潔身體，同埋注意保暖、穿著足夠的衣物，避免赤腳在家中走路，或長時間吹冷氣及風扇；切勿進食生冷食物，如凍飲、冰凍和寒涼的蔬果、壽司、沙律等等。
 
另外也要注意保持愉快正面的心情，氣血通暢，自然就會健康！

2) 產後脫髮點算好？

執媽：另外，好多媽媽都話產後甩頭髮好嚴重，甩到好驚變禿頭！點解會咁嘅？關唔關個腎事？可以點做呀？
 
醫師：產後脫髮係非常常見嘅情況，多數喺產後3至4個月開始出現，現代醫學理論認為媽媽產後內分泌失調所致，不過一般只維持一段短時間，如果有足夠休息及調理， 身體逐步恢復正常狀況，脫髮情況亦隨之減少下來，所以媽媽們唔使擔心。但如果脫髮狀態超過半年以上，便要留意自己的生活細節或詢問醫生／中醫師的專業意見。
 
中醫認為產後脫髮與「腎」關係密切，因為偉大嘅媽媽係用自己的「腎精」和「氣血」去養大BB，因此產後媽媽會出現腎精虧虛及氣血不足，唔夠分配營養畀頭髮，所以頭髮就好似樹葉咁乾枯脫落。中醫一般運用補肝腎健脾，益氣養血等中藥，以幫助媽媽們改善身體元氣大傷的狀態。另外，產後媽媽也要保持心情愉快，假如壓力過大，情緒不佳也會擾亂內分泌，增加脫髮風險。
 
如果媽媽發現自己產後脫髮，簡單的平時可以於炒米茶、飯菜或湯水入面加入黑芝麻、黑豆和枸杞子等補肝腎的中藥。飲食方面多進食菠菜、豆腐、海帶等食物，健脾補血，也補充鐵質、蛋白質及微量元素。
 
可試試呢個湯水：烏雞1隻、 制首烏 3錢、黃精3錢、杞子3錢、熟地3錢煲湯飲（感冒時候不宜飲用）

3) 如何下火又不退奶？

執媽：仲有，因為餵人奶嘅關係，好多媽媽都唔夠瞓，因為半夜上奶最多，好多人都要半夜追奶，係唔係因為呢個原因而「熱氣」呢？成日聽媽媽講會生痱滋，但又因為餵人奶而唔敢飲涼茶，驚會退奶，其實涼茶會唔會退奶㗎呢？如果唔得咁熱氣生痱滋又點算好？可以食咩食療而又唔影響餵奶㗎呢？
 
醫師：無錯，好多偉大的媽媽們，因為半夜餵人奶，休息不夠生「痱滋」，而多數生「痱滋」係因為「虛火」。
 
坊間「熱氣」的意思，其實包括「實火」和「虛火」兩個概念。「實火」的人一般精神狀態良好，怕熱多汗，口乾口苦，小便黃，大便不通暢。「虛火」的人則多經常熬夜、精神疲累、自覺熱但怕吹風、口乾但不想飲水。
 
如果過量飲用涼茶是有機會退奶的。不過如果媽媽真的「熱氣」，坐月後飲少量涼茶還是可以的，如果確實需要飲涼茶，切記少量即止，並最好於飽肚飲，防止寒涼直接影響脾胃。因為過量可能影響媽媽自己健康和飲人奶的BB。如果對自己身體狀態不了解，建議諮詢註冊中醫意見。
 
坐月四十朝內不太建議飲涼茶或生冷食物。如果真的是生「痱滋」，可以進食清潤的食物，如沙參、玉竹、麥冬、西洋參、石斛、雪梨、不過最重要都係要多休息！

執媽：多謝歐陽醫師講咗好多理論性嘅中醫概念，呢啲都係執媽好感興趣嘅知識！因為我總覺得，西醫唔可以解釋晒所有媽媽主觀地察覺的不適，如果唔係就唔會出現「坐月和身體保健」嘅概念喇
！不過中醫咁博大精深，好難憑一兩個徵狀、一兩句說話就解釋清楚你身體發生咩事，中醫都講求「望、聞、問、切」，如果有咩唔舒服，都係嗰句：「搵返專業註冊中醫親身去睇病」！如果想搵歐陽醫師聯絡方式，可以inbox執媽㗎！
 
按此重溫坐月知識及上奶湯水分享

感謝港式執媽授權分享內容。
更多產科知識，即上「港式執媽」專頁：https://www.facebook.com/pg/hkmidwife