【母乳媽媽】教你正確餵奶姿勢 (二)

上篇講到正確餵奶姿勢嘅重要性,媽媽要懂得觀察BB係咪用緊一個有效嘅食奶姿勢,咁先可以將積奶清空,令到身體再上奶,亦可以避免BB食損乳頭而令媽媽劇痛,搞到唔敢再俾BB埋身。
 
餵奶的確係成日會有疑問,到底佢食唔食到?食咗大半個鐘但一放低又喊?佢可能根本就食唔飽?突然有一排狂食,又有一排死都唔肯食?
 
總之,記住執媽講:「食人奶等於請BB食放題/自助餐,佢想食幾耐/幾時食都由得佢、滿足佢,只要係用正確嘅餵奶姿勢就可以喇」。
 
好,繼續講餵奶姿勢。
 
breastfeed_側躺式.jpg側躺式
1)適合想舒舒服服餵人奶嘅媽媽
2)啱啱開完刀,做完半身麻醉未方便坐起身餵奶嘅媽媽
3)同埋乳房底部塞奶嘅媽媽(乳房的6點鐘位置)
 
呢個姿勢可以俾媽媽繼續瞓喺床休息,重點在於媽媽同BB背脊嘅枕頭,可以支撐好媽媽,令佢嘅肌肉唔需要用力,用埋手/小枕頭/薄被,將BB墊到一個高度,佢一張開口就食得到乳暈同乳頭!
 
同樣地,呢個姿勢要頭、頸、身成一直線,BB同媽媽身體係緊貼嘅,媽媽亦要留意,用呢個姿勢餵奶,千萬千萬千萬唔可以瞓著!實在太重要,所以我想講多次:「媽媽唔可以瞓著」,如果唔係側身壓左落呀B到就大件事!
 

breastfeed_搖籃式.jpg搖籃式
呢個姿勢適合比較大嘅BB,唔使搵個乳頭畀佢都識自己搵嚟食嗰種,仲要BB個口要識張得夠大、含得夠深。所以呢個姿勢我覺得唔太適合初生BB,因為要佢哋食人奶已經係一個新技能,媽咪應該要搵個目標畀BB食而唔係由得佢自己搵,好多時新手媽媽俾BB食損乳頭,就係因為用咗呢種姿勢喇!
 
呢個姿勢已經唔講求頭、頸、身係唔係一直線,因為BB已經大個,識得去搵自己最舒服嘅食奶姿勢,可以帶埋BB出街,披條圍巾就用呢個搖籃式嚟餵。
 
breastfeed_足球式.jpg足球式/攬球式
即係抱BB喺左邊食左胸,抱喺右邊食右胸,呢個姿勢係執媽最鐘意教媽媽餵奶嘅姿勢,對於腋下、胸部外圍塞奶十分之有用。 對於新手媽媽嚟講,成日怕餵奶會焗親BB,呢個姿勢就正正可以畀你望住BB個樣嚟食奶,如果姿勢擺得好嘅話,係會見到下巴緊貼住胸嘅外圍,頭微微抬起,鼻哥窿就會外露,抖氣就會抖得好好㗎喇!
 
仲有俾太多奶媽媽專用嘅lay back position,以防奶出得太多太快濁親BB。
 
當然,亦要留意佢係咪用緊做緊有效嘅吸啜!睇返上一篇溫故知新!

感謝港式執媽授權分享內容。
更多產科知識,即上「港式執媽」專頁:https://www.facebook.com/pg/hkmidwife

更多精彩內容:【特集】母乳媽媽加油站

30670 views