自創菜式：鮮鮑魚蒸豆腐

帶子蒸豆腐就食得多，轉一轉個主角，換成鮮鮑魚仔，連埋豆腐一啖放入口，爽口彈牙，超正呀！

用清蒸方法係確保有海鮮鮮味，唔清蒸的話，加入果皮絲／蒜蓉一齊蒸亦可以。

＊　由於我唔識加水印落張相呀，最近發現有人轉載相片據為己有，請自重呀！

呢度14隻鮑魚仔，海鮮價日日唔同，$38-50。

先把鮑魚仔沖沖水，然後起左個殼。

起殼需要一把短小的刀，先反起鮑魚肉（有腸果邊，如圖），然後沿著鮑魚肉個邊，貼實個殼撬舊肉出黎。

記緊係貼住個殼黎撬，咁樣就唔會淨低Ｄ鮑魚肉痴住個殼架喇！

另外小心唔好介爛Ｄ腸，免得Ｄ腸汁噴出黎。

起左殼後，見到個頭有粒粉紅色野嗎？整走埋佢！

準備一支硬毛牙刷，洗刷全隻鮑魚。

好明顯，左邊係刷乾淨，右邊未刷。

之後可以開碗水，加粗鹽同生粉，放入鮑魚仔用手"拿"下佢，去左Ｄ潺。

在鮑魚底部橫直界幾刀。

我試過唔界，又試過在鮑魚面部界，都係在鮑魚底部界較好，因為鮑魚面向底會吸住舊豆腐，唔洗好似帶子咁要加Ｄ生粉水令佢痴實舊豆腐。

切好豆腐，鮑魚仔鋪上面，就可以拎去蒸。

水滾落鑊蒸4分鐘，開鑊蓋見到鮑魚個邊都收哂，即係已經熟，可以關蓋焗多1分鐘。

起鑊爆香蔥碎，豉油，淋上鮑魚豆腐表面。

搖勻隻碟令豉油平均分佈，搞掂～