椒鹽鮮魷。少油。脆卜卜。零粉感

椒鹽鮮魷，除左有人怕熱氣，膽固醇高，會避之則吉外，

我真係諗唔到，有咩人會抗拒脆卜卜又咸香既椒鹽鮮魷？！

當然，煎炸野緊係唔好成日食，但偶爾一吃，都想食到稱心滿意的，自問係椒鹽鮮魷精，基本上一去大排檔或者小菜飯店，都必點椒鹽鮮魷，有Ｄ太燶，有Ｄ太厚炸粉，有Ｄ林，有Ｄ仲出水添...

參差如此，不如自己煮～

事實上，椒鹽鮮魷的確唔易煮，頭幾次我都唔滿意，煮多幾次，終於得心應手，先至夠膽出blog post，我有信心，水準勝過唔少茶餐廳架～

材料：
大魷魚一條（約$40）；指天椒3大條；乾蔥2粒；蒜頭半個；鹽；糖；紹酒；栗粉。

造法：

＞魷魚洗乾淨，去衣（紫紅色有點點）
＞切走魷魚內果條骨，同魷魚頭硬身既野
＞分件切成圖中模樣
＞最大果塊沿著中間條坑一開二

魷魚捲起有菱格，除左好睇，其實會入味同易熟Ｄ。
　
魷魚菱格切法：

＞用刀背打斜，在魷魚較滑身果面，片入去

＊　用刀背打斜片，唔會切斷魷魚
＞同一方向片到尾，再轉方向又片到尾
＞片完後，將魷魚反開，應該會好似圖中有一粒粒正方形格仔反到出黎

＊　如果片得唔夠入就反唔到正方形格仔，就會捲得唔靚
＞切開魷魚為小塊，每塊闊度最少要有尾指咁闊

＊　如果切得太細塊，煮起黎會縮到好細粒

＞魷魚果兩塊翼，打直界開，切成圖中模樣
＞同樣地，切成最少有尾指既闊度

標題所講：少油。脆卜卜。零粉感既重點之一，係出水，沖水，晾透。

呢個步驟一來會令鮮魷快Ｄ熟，落少Ｄ油；二來出過水，再煮會分泌少好多水，收水自然快，自然脆。

炒蜆／炒帶子等，都係同樣道理。

＞煲滾水，加適量鹽；糖；紹酒，缺一不可，就可以令鮮魷如大廚所講既，有底味！
＞鮮魷落滾水，出水一分鐘

＞撈起，沖凍水等佢收縮
＞俾Ｄ時間佢晾乾透

＞等緊鮮魷晾乾透期間，可以切碎指天椒（去籽）；乾蔥；蒜頭
＞加入鹽；糖；約半茶匙之少既紹酒

＞鮮魷晾乾透後，上栗粉
＊　我習慣會放在筲箕裡上粉，因為多餘既粉可篩走
＊　要確保每塊鮮魷都有薄薄一層粉，不可多不可少

＞比平時多少少油，用剪炸方式
＞火力為中大火，見鮮魷轉金黃色，開最大火快速兜炒，逼番Ｄ油出黎
＞倒去油，用切好既料頭起鑊，鮮魷回鑊快速兜炒，即成

舊舊脆口到，咬落係聽到聲架～零粉感，鮮魷唔會過韌，調味剛好，唯獨鮮魷味可能出水果陣去左D，我覺得可以再觧Ｄ，我俾自己90分架喇～