土茯苓牛大力粉葛赤小豆扁豆煲鯪魚湯

近日夫君周身雜症，先係曬傷左俾我搽cream按摩面搞到皮膚敏感，再來踢波帶來的新傷舊患令菠蘿蓋疼痛，加上經常ＯＴ頸痛，就係煲呢Ｄ個名水蛇春咁長既湯既時候喇，其實仲可以加埋鑽地老鼠，不過湯料經已太多，下次吧。

材料：
鮮土茯苓；牛大力；粉葛；赤小豆；扁豆；蜜棗；鯪魚

功效：

土茯苓：除濕解毒，通利關節，治療某種類型的皮膚痕癢等

牛大力：補虛潤肺，強筋活絡，治療腰肌勞損，風濕關節炎等

粉葛：解熱退燒，降低血糖，透疹止瀉，治療熬夜頸背筋骨酸痛等

赤小豆：利水除濕，和血排膿，消腫解毒，治療水腫腳氣等

扁豆：健脾，消暑化濕

鯪魚：益氣血，健筋骨，通小便

牛大力性質微寒，有輕瀉作用，單獨使用容易令服用者大便稀爛，配合土茯苓等材料，可以去濕利尿，利小便以實大便，消除牛大力的副作用。

圓形一片片的是牛大力，啡橙色的是鮮土茯苓，兩者都係菜檔已經切好，回家沖洗，略浸就可以。

土茯苓＋牛大力＋粉葛＝$55，係咪差唔多喇？我有無比佢搵笨呢哈哈？！

粉葛去皮，切細塊。

赤小豆，扁豆最好浸最少一小時，豆類浸耐少少可避免生肚氣／胃氣。

鯪魚洗乾淨，切好薑片，預備起鑊煎魚。

魚煎香兩邊，灒入滾水／滾湯，把魚及魚湯倒進煲中。

中火煲30分鐘，轉細火煲1.5小時。以上份量2人可飲2日。

啖湯又濃又溶，好甜呀！