牛蒡紅蘿蔔粟米豬展湯

紅蘿蔔粟米，除左配青蘿蔔，又可配蕃茄薯仔，又可配紅菜頭，也可配竹蔗茅根，真係煲湯既多功能鐵膽呀！

今次介紹多一款，配牛蒡～

材料（2人份量）：

牛蒡1條；紅蘿蔔1條；粟米1條；豬展最少$20；南北杏；蜜棗

＊　牛蒡與牛大力並不一樣，上網見到有人話係一樣，明明就係兩樣材料，去菜檔買果陣要講清楚呀！

呢支柴咁既樣，就係牛蒡喇，佢好醜但好溫柔啊～

功效：牛蒡：蘊含大量礦物質，胺基酸，高纖膳食纖維，多種多酚類植化素，能防癌，降低心血管疾病風險，降膽固醇，提升肝臟的代謝能力與解毒功能，進而促進血糖、血脂的代謝等等，有非常全面的食療價值

紅蘿蔔，粟米：健脾益氣，紅蘿蔔更含豐富維生素Ａ，而且幫助腸道蠕動

牛蒡削皮切片；紅蘿蔔削皮切塊；粟米斬件；南北杏及蜜棗略浸；豬展出水再洗淨

圖中是粟米鬢，具有利水，降壓解熱的功效。粟米剝開後會有呢ｄ鬢，洗淨，與其他材料一齊煲。

中火煲30分鐘；轉細火煲1.5小時。

啖湯甜甜的，還有牛蒡的獨特香氣。